Read Swahilli Zaburi 19 Bible Online

Zaburi 19 - Swahilli bible

Zaburi 19

¹(Kwa Mwimbishaji. Zaburi ya Daudi) Mbingu zatangaza utukufu wa Mungu; anga ladhihirisha kazi ya mikono yake.

²Mchana waupasha habari mchana ufuatao, usiku waufahamisha usiku ufuatao.

³Hamna msemo au maneno yanayotumika; wala hakuna sauti inayosikika;

⁴ hata hivyo, sauti yao yaenea duniani kote, na maneno yao yafika kingo za ulimwengu. Mungu ameliwekea jua makao yake angani;

⁵nalo hutoka kama bwana arusi chumbani mwake, lafurahi kama shujaa aliye tayari kushindana.

⁶Lachomoza toka upande mmoja, na kuzunguka hadi upande mwingine; hakuna kiwezacho kuliepa joto lake.

⁷Sheria ya Mwenyezi-Mungu ni kamilifu, humpa mtu uhai mpya; masharti ya Mwenyezi-Mungu ni thabiti, huwapa hekima wasio na makuu.

⁸Kanuni za Mwenyezi-Mungu ni sawa, huufurahisha moyo; amri ya Mwenyezi-Mungu ni safi, humwelimisha mtu.

⁹Kumcha Mwenyezi-Mungu ni jambo jema, na la kudumu milele; maagizo ya Mwenyezi-Mungu ni sawa, yote ni ya haki kabisa.

¹⁰Yatamanika kuliko dhahabu; kuliko dhahabu safi kabisa. Ni matamu kuliko asali; kuliko asali safi kabisa.

¹¹Yanifunza mimi mtumishi wako; kuyafuata kwaniletea tuzo kubwa.

¹²Lakini nani aonaye makosa yake mwenyewe? Ee Mungu, niepushe na makosa nisiyoyajua.

¹³Unikinge mimi mtumishi wako na makosa ya makusudi, usikubali hayo yanitawale. Hapo nitakuwa mkamilifu, wala sitakuwa na hatia ya kosa kubwa.

¹⁴Maneno ya kinywa changu, na mawazo ya moyo wangu, yakubalike mbele yako, ee Mwenyezi-Mungu, mwamba wangu na mkombozi wangu!