Read Swahilli Zaburi 22 Bible Online

Zaburi 22 - Swahilli bible

Zaburi 22

¹(Kwa Mwimbishaji: Mtindo wa utenzi wa kulungu wa alfajiri. Zaburi ya Daudi) Mungu wangu, Mungu wangu, mbona umeniacha? Mbona uko mbali sana kunisaidia, mbali na maneno ya kilio changu?

²Ee Mungu wangu, nalia mchana lakini hujibu; napiga yowe usiku, lakini nafuu sipati.

³Hata hivyo, wewe ni mtakatifu; wewe watawala na kusifiwa na Waisraeli.

⁴Wazee wetu walikutegemea; walikutegemea, nawe ukawaokoa.

⁵Walikulilia wewe, wakaokolewa; walikutegemea, nao hawakuaibika.

⁶Lakini mimi ni mdudu tu, wala si mtu; nimepuuzwa na kudharauliwa na watu.

⁷ Wote wanionao hunidhihaki; hunifyonya na kutikisa vichwa vyao.

⁸ Husema: “Alimtegemea Mwenyezi-Mungu, basi, Mungu na amkomboe! Kama Mungu anapendezwa naye, basi, na amwokoe!”

⁹Lakini ndiwe uliyenitoa tumboni mwa mama yangu, uliniweka salama kifuani pa mama yangu.

¹⁰Nimekutegemea tangu kuzaliwa kwangu. Tangu nilipozaliwa wewe umekuwa Mungu wangu.

¹¹Usikae mbali nami, kwani taabu imekaribia; wala hakuna wa kunisaidia.

¹²Maadui wengi wanizunguka kama fahali; wamenisonga kama fahali wakali wa Bashani!

¹³Wanafunua vinywa vyao kama simba, tayari kushambulia na kurarua.

¹⁴Nimekwisha kama maji yaliyomwagika; mifupa yangu yote imeteguka; moyo wangu ni kama nta, unayeyuka ndani mwangu.

¹⁵Koo[11] langu limekauka kama kigae; ulimi wangu wanata kinywani mwangu. Umeniacha kwenye mavumbi ya kifo.

¹⁶Genge la waovu limenizunguka; wananizingira kama kundi la mbwa; wamenitoboa[12] mikono na miguu.

¹⁷Nimebaki mifupa mitupu; maadui zangu waniangalia na kunisimanga.

¹⁸ Wanagawana nguo zangu, na kulipigia kura vazi langu.

¹⁹Lakini wewe ee Mwenyezi-Mungu, usikae mbali nami; ewe msaada wangu, uje haraka kunisaidia.

²⁰Iokoe nafsi yangu mbali na upanga, yaokoe maisha yangu makuchani mwa mbwa hao!

²¹Uniokoe kinywani mwa simba; iokoe nafsi yangu dhaifu[13] toka pembe za nyati hao.

²² Nitawasimulia ndugu zangu matendo yako; nitakusifu kati ya kusanyiko lao:

²³Enyi mnaomcha Mwenyezi-Mungu, msifuni! Mtukuzeni enyi wazawa wote wa Yakobo! Mcheni Mungu enyi wazawa wote wa Israeli!

²⁴Maana yeye hapuuzi au kudharau unyonge wa mnyonge; wala hajifichi mbali naye, ila humsikia anapomwomba msaada.

²⁵Kwa sababu yako ninakusifu katika kusanyiko kubwa la watu; nitatimiza ahadi zangu mbele yao wakuchao.

²⁶Maskini watakula na kushiba; wanaomtafuta Mwenyezi-Mungu watamsifu. Mungu awajalie kuishi milele!

²⁷Ulimwengu wote utakumbuka na kumrudia Mwenyezi-Mungu; jamaa zote za mataifa zitamwabudu.

²⁸Maana Mwenyezi-Mungu ni mfalme; yeye anayatawala mataifa.

²⁹Wenye kiburi wote duniani watasujudu mbele yake; wote ambao hufa watainama mbele yake, wote ambao hawawezi kudumisha uhai wao.

³⁰Vizazi vijavyo vitamtumikia; watu watavisimulia habari za Mwenyezi-Mungu,

³¹watatangaza matendo yake ya wokovu. Watu wasiozaliwa bado wataambiwa: “Mwenyezi-Mungu ndiye aliyefanya hayo!”