Read Swahilli Zaburi 78 Bible Online

Zaburi 78 - Swahilli bible

Zaburi 78

¹(Utenzi wa Asafu) Sikieni mafundisho yangu, enyi watu wangu; yategeeni sikio maneno ya kinywa changu.

² Nitasema nanyi kwa mafumbo, nitasema mambo yaliyofichika tangu kale;

³mambo tuliyoyasikia na kuyajua, mambo ambayo wazee wetu walitusimulia.

⁴Hatutawaficha watoto wetu; ila tutakisimulia kizazi kijacho matendo matukufu ya Mwenyezi-Mungu na uwezo wake; tutawaambia maajabu yake aliyotenda.

⁵Aliwapa wazawa wa Yakobo masharti, aliweka sheria katika Israeli, ambayo aliwaamuru wazee wetu wawafundishe watoto wao;

⁶ili watu wa kizazi kijacho, watoto watakaozaliwa baadaye, wazijue, nao pia wawajulishe watoto wao,

⁷ili wamwekee Mungu tumaini lao, wasije wakasahau matendo ya Mungu, bali wazingatie amri zake.

⁸Wasiwe kama walivyokuwa wazee wao, watu wakaidi na waasi; kizazi ambacho hakikuwa na msimamo thabiti, ambacho hakikuwa na uaminifu kwa Mungu.

⁹Watu wa Efraimu, pinde na mishale mkononi, walirudi nyuma, wakakimbia siku ile ya vita.

¹⁰Hawakulizingatia agano la Mungu; walikataa kufuata sheria yake.

¹¹Walisahau mambo aliyokuwa ametenda, miujiza aliyokuwa amewaonesha.

¹²Alifanya maajabu mbele ya wazee wao, kondeni Soani, nchini Misri.

¹³Aliigawa bahari, akawapitisha humo; aliyafanya maji yasimame kama ukuta.

¹⁴Mchana aliwaongoza kwa wingu; usiku kucha kwa mwanga wa moto.

¹⁵Aliipasua miamba kule jangwani, akawanywesha maji kutoka vilindini.

¹⁶Alibubujisha vijito kutoka mwambani, akatiririsha maji kama mito.

¹⁷Hata hivyo waliendelea kumkosea Mungu; walimwasi Mungu Mkuu kule jangwani.

¹⁸Walimjaribu Mungu kwa makusudi; wakidai wapewe chakula walichotaka.

¹⁹Walimkufuru Mungu wakisema: “Je, Mungu aweza kutupa chakula jangwani?

²⁰Ni kweli, aliupiga mwamba, maji yakabubujika kama mto; lakini, sasa aweza kweli kutupatia mkate, na kuwapatia watu wake nyama?”

²¹Mwenyezi-Mungu, aliposikia hayo, alijawa na ghadhabu, moto ukawawakia wazawa wa Yakobo; hasira yake ikawavamia watu wa Israeli,

²²kwa sababu hawakuwa na imani naye, wala hawakuamini nguvu yake ya kuokoa.

²³Hata hivyo aliyaamuru mawingu ya juu, akaifungua milango ya mbingu;

²⁴ akawanyeshea mana wale, akawapa nafaka kutoka mbinguni.

²⁵Binadamu, wakala chakula cha malaika; naye aliwapelekea chakula cha kutosha.

²⁶Alivumisha upepo wa mashariki, kwa nguvu yake akachochea pepo za kusini;

²⁷akawanyeshea watu wake nyama kama vumbi, ndege wengi kama mchanga wa pwani;

²⁸ndege hao walianguka kambini mwao, kila mahali kuzunguka makao yao.

²⁹Watu walikula wakashiba; Mungu aliwapa walichotaka.

³⁰Lakini hata kabla ya kutosheleza hamu yao, chakula kikiwa bado mdomoni mwao,

³¹hasira ya Mungu iliwaka juu yao; akawaua wenye nguvu miongoni mwao, na kuwaangusha vijana wa Israeli.

³²Hata hivyo waliendelea kumkosea Mungu; ijapokuwa alitenda maajabu, hawakuamini.

³³Basi, akazikatisha siku zao kama pumzi, miaka yao kwa maafa ya ghafla.

³⁴Kila alipowaua, waliobaki walimgeukia; walitubu, wakamgeukia Mungu kwa moyo.

³⁵Walikumbuka kwamba Mungu alikuwa mwamba wao; Mungu Mkuu alikuwa mkombozi wao.

³⁶Lakini walimdanganya kwa maneno yao; kila walichomwambia kilikuwa uongo.

³⁷Hawakuambatana naye kwa moyo, hawakuwa waaminifu kwa agano lake.

³⁸Lakini Mungu mwenye huruma alisamehe uovu wao, na wala hakuwaangamiza. Mara nyingi aliizuia hasira yake, wala hakuiacha ghadhabu yake yote iwake.

³⁹Alikumbuka kwamba wao ni watu tu; ni kama upepo upitao na kutoweka.

⁴⁰Mara ngapi walimwasi kule jangwani, na kumchukiza hukohuko nyikani!

⁴¹Walimjaribu Mungu tena na tena, wakamkasirisha huyo Mtakatifu wa Israeli.

⁴²Hawakuikumbuka nguvu yake, wala siku ile alipowaokoa na maadui zao,

⁴³alipotenda maajabu nchini Misri, na miujiza kondeni Soani!

⁴⁴Aliigeuza ile mito kuwa damu, Wamisri wasipate maji ya kunywa.

⁴⁵Aliwapelekea makundi ya nzi waliowasumbua, na vyura waliowatia hasara.

⁴⁶Alituma nzige, wakala mavuno yao, na kuharibu mashamba yao.

⁴⁷Aliiharibu mizabibu yao kwa mvua ya mawe, na mitini yao kwa baridi kali.

⁴⁸Ngombe wao aliwaua kwa mvua ya mawe, na kondoo wao kwa radi.[44]

⁴⁹Aliacha hasira yake kali iwawakie, ghadhabu, chuki na dhiki, na kundi la malaika waangamizi.

⁵⁰Aliachilia hasira yake iendelee, wala hakuwaepusha na kifo, bali aliwaangamiza kwa tauni.

⁵¹Aliwaua wazaliwa wa kwanza wote wa Wamisri; naam, chipukizi wa kwanza kambini mwa Hamu.

⁵²Kisha aliwahamisha watu wake kama kondoo, akawaongoza jangwani kama kundi la mifugo.

⁵³Aliwaogoza salama, wala hawakuogopa; lakini bahari iliwafunika maadui zao.

⁵⁴Aliwaleta katika nchi yake takatifu, katika mlima aliouteka kwa nguvu yake.

⁵⁵Aliyafukuza mataifa mbele yao, akazitoa nchi zao ziwe mali ya Israeli, akayakalisha makabila ya Israeli mahemani mwao.

⁵⁶Hata hivyo walimjaribu na kumwasi Mungu Mkuu; wala hawakuzingatia masharti yake.

⁵⁷Ila waligeuka na kufanya mabaya kama wazee wao; wakayumbayumba kama upinde usio imara.

⁵⁸Walimkasirisha kwa madhabahu zao za miungu; wakamchochea aone wivu kwa sanamu zao za kuchonga.

⁵⁹Mungu alipoona hayo, akawaka hasira; akamkataa Israeli katakata.

⁶⁰Aliyaacha makao yake kule Shilo, makao ambamo alikaa kati ya watu.

⁶¹Aliiacha ishara ya nguvu yake[45] itekwe, utukufu wake utiwe mikononi mwa maadui.

⁶²Aliwakasirikia watu wake mwenyewe; akawatoa waangamizwe kwa upanga.

⁶³Moto ukawateketeza vijana wao wa kiume, na wasichana wao wakakosa wachumba.

⁶⁴Makuhani wao walikufa kwa upanga, wala wajane wao hawakuomboleza.

⁶⁵Kisha Bwana aliamka kama kutoka usingizini, kama shujaa aliyechangamshwa na divai.

⁶⁶Akawatimua maadui zake; akawatia aibu ya kudumu milele.

⁶⁷Lakini aliikataa jamaa ya Yosefu, wala hakulichagua kabila la Efraimu.

⁶⁸Ila alilichagua kabila la Yuda, mlima Siyoni anaoupenda.

⁶⁹Alijenga hapo hekalu lake kubwa kama mbingu, kama dunia aliyoiweka imara milele.

⁷⁰Alimchagua Daudi, mtumishi wake, akamtoa katika kazi ya kuchunga kondoo.

⁷¹Alimtoa katika kazi ya kuchunga kondoo na wanakondoo, awe na jukumu la kuchunga watu wa Yakobo taifa lake. Achunge Israeli, watu wake Mungu mwenyewe.

⁷²Daudi akawafunza kwa moyo wake wote, akawaongoza kwa uhodari mkubwa.