Read Swahilli Zaburi 95 Bible Online

Zaburi 95 - Swahilli bible

Zaburi 95

¹Njoni tumwimbie Mwenyezi-Mungu, tumshangilie mwamba wa wokovu wetu!

²Twende mbele zake na shukrani; tumshangilie kwa nyimbo za sifa.

³Maana Mwenyezi-Mungu, ni Mungu mkuu; yeye ni Mfalme mkuu juu ya miungu yote.

⁴Vilindi vyote vya dunia vimo mikononi mwake, vilele vya milima ni vyake.

⁵Bahari ni yake, ndiye aliyeifanya; kwa mikono yake aliiumba nchi kavu.

⁶Njoni tusujudu na kumwabudu; tumpigie magoti Mwenyezi-Mungu, Muumba wetu!

⁷ Maana yeye ni Mungu wetu, nasi ni watu wa kundi lake, ni kondoo wake anaowachunga. Laiti leo mngesikiliza sauti yake:

⁸“Msiwe wakaidi kama kule Meriba, kama walivyokuwa kule Masa jangwani,

⁹wazee wenu waliponijaribu na kunipima, ingawa walikuwa wameona mambo niliyowatendea.

¹⁰Kwa miaka arubaini nilichukizwa nao, nikasema: ‘Kweli, hawa ni watu waliopotoka! Hawajali kabisa njia zangu!’

¹¹ Basi, nilikasirika, nikaapa: ‘Hawataingia mahali pangu pa pumziko!’”