Read Swahilli Methali 13 Bible Online

Methali 13 - Swahilli bible

Methali 13

¹Mtoto mwenye hekima husikia maagizo ya baba yake, lakini mwenye dharau hasikilizi maonyo.

²Mtu mwema hupata mema kutokana na maneno yake, lakini wadanganyifu huishi kwa ukatili.

³Achungaye mdomo wake huyahifadhi maisha yake, anayeropoka ovyo hujiletea maangamizi.

⁴Mvivu hutamani lakini hapati chochote, hali mwenye bidii hujaliwa riziki kwa wingi.

⁵Mwadilifu huuchukia uongo, lakini mwovu hutenda kwa aibu na fedheha.

⁶Uadilifu huwalinda wenye mwenendo mnyofu, lakini dhambi huwaangusha waovu.

⁷Baadhi hujidai kuwa matajiri kumbe hawana kitu; wengine hujiona kuwa maskini hali wana mali tele.

⁸Fidia ya mtu ni mali yake, lakini maskini hana cha kutishwa.

⁹Mwadilifu hungaa kama taa iwakayo vizuri, lakini waovu ni kama taa inayozimika.

¹⁰Kiburi husababisha tu ugomvi, lakini kwa wanaokubali shauri jema mna hekima.

¹¹Mali ya harakaharaka hutoweka, lakini akusanyaye kidogokidogo ataiongeza.

¹²Tumaini la kungojangoja huumiza moyo, lakini tazamio linalotimia ni mti wa uhai.

¹³Anayedharau mawaidha anajiletea maangamizi, lakini anayetii amri atapewa tuzo.

¹⁴Mafundisho ya wenye hekima ni chemchemi ya uhai; humwezesha mtu kuiepa mitego ya kifo.

¹⁵Kuwa na akili huleta fadhili, lakini njia ya waovu ni ya taabu[16]

¹⁶Mwenye busara hutenda kila kitu kwa akili, lakini mpumbavu hutembeza upumbavu wake.

¹⁷Mjumbe mbaya huwatumbukiza watu taabuni,[17] lakini mjumbe mwaminifu huleta nafuu.

¹⁸Umaskini na fedheha humpata asiyejali mafundisho, lakini mwenye kusikia maonyo huheshimiwa.

¹⁹Inafurahisha upatapo kile unachotaka, kwa hiyo wapumbavu huchukia kuepa uovu.

²⁰Anayeandamana na wenye hekima hupata hekima, lakini anayejiunga na wapumbavu atapata madhara.

²¹Watendao dhambi huandamwa na balaa, lakini waadilifu watatuzwa mema.

²²Mtu mwema huwaachia urithi uzao wake, lakini mali ya mwenye dhambi imerundikiwa waadilifu.

²³Shamba la maskini hutoa mazao mengi, lakini bila haki hunyakuliwa.[18]

²⁴Asiyemwadhibu mtoto wake hampendi; lakini ampendaye mwanawe humrudi mapema.

²⁵Mwadilifu anacho chakula cha kumtosheleza, lakini tumbo la waovu hutaabika kwa njaa.