Read Swahilli Methali 17 Bible Online

Methali 17 - Swahilli bible

Methali 17

¹Afadhali mkate mkavu kwa amani, kuliko karamu katika nyumba ya ugomvi.

²Mtumwa mwenye busara atachukua nafasi ya mwana mpumbavu, atapata sehemu ya urithi wa jamaa hiyo.

³Ubora wa dhahabu ama fedha hupimwa kwa moto, lakini Mwenyezi-Mungu ndiye apimaye mioyo ya watu.

⁴Mtenda maovu husikiliza maneno mabaya, mwongo hutegea sikio ulimi mdanganyifu.

⁵Anayemdhihaki maskini anamtukana Muumba wake; anayefurahia maafa hatakosa kuadhibiwa.

⁶Wazee huwaonea fahari wajukuu zao; watoto huwaonea fahari wazazi wao.

⁷Maneno mazuri si kawaida kinywani mwa mpumbavu, sembuse maneno ya uongo kinywani mwa kiongozi!

⁸Kwa mhongaji, hongo ni kama hirizi; kila afanyacho hufanikiwa.

⁹Anayesamehe makosa hujenga urafiki, lakini anayekumbusha makosa hutenga rafiki.

¹⁰Onyo kwa mwenye busara lina maana, kuliko mapigo mia kwa mpumbavu.

¹¹Afanyalo mtu mwovu ni kuasi tu; mjumbe mkatili atatumwa dhidi yake.

¹²Afadhali kukutana na dubu jike aliyenyanganywa watoto wake, kuliko kukutana na mpumbavu katika upumbavu wake.

¹³Mwenye kulipiza mema kwa mabaya, mabaya hayataondoka nyumbani mwake.

¹⁴Kuanzisha ugomvi ni kama kufanya ufa kwenye bwawa; achana na ugomvi kabla haujafurika.

¹⁵Kumsamehe mwenye hatia na kumwadhibu asiye na hatia yote mawili ni chukizo kwa Mwenyezi-Mungu.

¹⁶Ya nini mpumbavu kuwa na fedha mkononi kununulia hekima, wakati yeye mwenyewe hana akili?

¹⁷Rafiki wa kweli ni rafiki siku zote, ndugu huzaliwa asaidie wakati wa taabu.

¹⁸Si jambo la akili kuweka rehani, na kuwa mdhamini wa mtu mwingine.

¹⁹Anayependa ugomvi anapenda dhambi; anayejigamba[21] anajitafutia maangamizi.

²⁰Mwenye moyo mpotovu hafanikiwi, na msema uongo hupatwa na maafa.

²¹Mtoto mpumbavu ni huzuni kwa baba yake, na baba wa mpumbavu hana furaha.

²²Moyo mchangamfu ni dawa, bali moyo wenye huzuni hudhoofisha mwili.

²³Mtu mbaya hupokea hongo kwa siri ili apate kupotosha haki.

²⁴Mtu mwenye busara lengo lake ni hekima, lakini mpumbavu hupania kila kitu duniani.

²⁵Mtoto mpumbavu ni huzuni kwa baba yake, na uchungu kwa mama yake mzazi.

²⁶Si vizuri kumtoza faini mtu asiye na hatia; ni kosa kumchapa viboko muungwana.

²⁷Asiyesema sana ana maarifa; mtu mtulivu ni mwenye busara.

²⁸Hata mpumbavu akinyamaza huonekana ana hekima; akifunga mdomo wake huonekana kuwa mwenye akili.