Read Swahilli Methali 5 Bible Online

Methali 5 - Swahilli bible

Methali 5

¹Mwanangu, sikia hekima yangu, tega sikio usikilize elimu yangu.

²Ndipo utakapoweza kuhifadhi busara, na midomo yako izingatie maarifa.

³Mdomo wa mwanamke mpotovu ni mtamu kama asali, maneno yake ni laini kuliko mafuta;[3]

⁴lakini hatimaye ni mchungu kama pakanga, ni mkali kama upanga wenye makali kuwili.

⁵Nyayo zake zaelekea chini mautini, hatua zake zaenda kuzimu.

⁶Yeye haijali njia ya uhai, njia zake ni za kutangatanga, wala hajui.

⁷Sasa enyi wanangu, nisikilizeni, wala msisahau maneno ya kinywa changu.

⁸Iepushe njia yako mbali naye, wala usiukaribie mlango wa nyumba yake.

⁹Usije ukawapa wengine heshima yako, na wakatili miaka yako;

¹⁰wageni wasije wakajishibisha kwa mali yako, na jasho lako likaishia nyumbani kwa mgeni.

¹¹Mwishoni mwa maisha yako utaomboleza wakati mwili wako utakapoangamizwa.

¹²Hapo utasema, “Jinsi gani nilivyochukia nidhamu, na kudharau maonyo moyoni mwangu!

¹³Sikuisikiliza sauti ya waalimu wangu, wala kuwategea sikio wakufunzi wangu.

¹⁴Sasa niko karibu kuangamia kabisa mbali na jumuiya ya watu.”

¹⁵Mkeo ni kama kisima cha maji safi: Kunywa maji ya kisima chako mwenyewe.

¹⁶Ya nini chemchemi zako zitawanywe mbali, na vijito vya maji barabarani?

¹⁷Hiyo ni yako wewe mwenyewe, wala usiwashirikishe watu wengine.

¹⁸Chemchemi yako na ibarikiwe, umfurahie mke uliyemwoa ukiwa kijana.

¹⁹Ni mzuri kama ayala, apendeza kama paa. Mahaba yake yakufurahishe kila wakati, umezwe daima na pendo lake.

²⁰Mwanangu, ya nini kutekwa na mwanamke mwasherati? Ya nini kumkumbatia kifuani mwanamke mgeni?

²¹Kumbuka njia za mtu zi wazi mbele ya Mwenyezi-Mungu; yeye anaona kila hatua anayochukua binadamu.

²²Mtu mwovu hunaswa kwa uovu wake mwenyewe; hukamatwa katika tanzi za dhambi yake mwenyewe.

²³Yeye hufa kwa utovu wa nidhamu, huangamia kwa sababu ya upuuzi wake mkuu.