Read Swahilli Methali 7 Bible Online

Methali 7 - Swahilli bible

Methali 7

¹Mwanangu, yashike maneno yangu, zihifadhi kwako amri zangu.

²Zifuate amri zangu nawe utaishi; yalinde mafundisho yangu kama mboni ya jicho lako.

³Yafunge vidoleni mwako; yaandike moyoni mwako.

⁴Iambie Hekima: “Wewe ni dada yangu”, na Busara “Wewe ni rafiki yangu”.

⁵Vitakulinda mbali na mwanamke mbaya, vitakuepusha na maneno matamu ya mwanamke mgeni.

⁶Siku moja dirishani mwa nyumba yangu, nilichungulia nje kupitia viunzi vya dirisha,

⁷nikawaona vijana wengi wajinga, na mmoja hasa aliyekuwa mpumbavu.

⁸Huyo alikuwa akitembea kwenye barabara ile, karibu na kona alikoishi mwanamke fulani. Basi akashika njia iendayo nyumbani kwa mwanamke huyo.

⁹Ilikuwa yapata wakati wa jioni, giza na usiku vilikuwa vimeanza kuingia.

¹⁰Punde kijana akakutana na huyo mwanamke; amevalia kama malaya, ana mipango yake.

¹¹Alikuwa mwanamke wa makelele na mkaidi; miguu yake haitulii nyumbani:

¹²Mara barabarani, mara sokoni, katika kila kona ya njia hakosekani akivizia.

¹³Alimkumbatia kijana huyo na kumbusu, na kwa maneno matamu, akamwambia:

¹⁴“Ilinilazimu kutoa tambiko zangu; leo hii nimekamilisha nadhiri yangu.

¹⁵Ndio maana nimetoka ili nikulaki, nimekutafuta kwa hamu nikakupata.

¹⁶Nimetandika kitanda changu vizuri, kwa shuka za rangi za kitani kutoka Misri.

¹⁷Nimekitia manukato, manemane, udi na mdalasini.

¹⁸Njoo tulale pamoja mpaka asubuhi; njoo tujifurahishe kwa mahaba.

¹⁹Mume wangu hayumo nyumbani, amekwenda safari ya mbali.

²⁰Amechukua bunda la fedha; hatarejea nyumbani karibuni.”

²¹Alimshawishi kwa maneno mengi ya kubembeleza; kijana akashawishika kwa maneno yake matamu.

²²Hapo akamfuata huyo mwanamke moja kwa moja, kama ng'ombe aendaye machinjioni, kama paa arukiaye mtegoni.

²³Hakutambua kwamba hiyo itamgharimu maisha yake, mpaka alipojikuta amekuwa kama amechomwa mshale moyoni, amekuwa kama ndege aliyenaswa wavuni.

²⁴Sasa wanangu, nisikilizeni; yategeeni sikio maneno ya kinywa changu.

²⁵Msikubali kuongozwa na mwanamke kama huyo, wala msipitepite katika mapito yake.

²⁶Maana amewaangusha wanaume wengi; ni wengi mno hao aliowachinja.

²⁷Nyumba yake ni njia ya kwenda kuzimu, ni mahali pa kuteremkia mautini.