Read Swahilli Mhubiri 3 Bible Online

Mhubiri 3 - Swahilli bible

Mhubiri 3

¹Kila kitu kina majira yake, kila jambo duniani lina wakati wake:

²Wakati wa kuzaliwa na wakati wa kufa; wakati wa kupanda na wakati wa kuvuna kilichopandwa;

³wakati wa kuua na wakati wa kuponya; wakati wa kubomoa na wakati wa kujenga;

⁴wakati wa kulia na wakati wa kucheka; wakati wa kuomboleza na wakati wa kucheza;

⁵wakati wa kutupa mawe na wakati wa kuyakusanya mawe pamoja; wakati wa kukumbatia na wakati wa kuacha kukumbatia;

⁶wakati wa kutafuta na wakati wa kupoteza; wakati wa kuhifadhi na wakati wa kutupa;

⁷wakati wa kurarua na wakati wa kushona; wakati wa kukaa kimya na wakati wa kuongea;

⁸wakati wa kupenda na wakati wa kuchukia; wakati wa vita na wakati wa amani.

⁹Mfanyakazi hufaidi nini kutokana na juhudi zake hizo?

¹⁰Mimi nimeiona kazi ambayo binadamu amepewa na Mungu.

¹¹Mungu amekifanya kila kitu kiwe kizuri kwa wakati wake. Amempa binadamu hamu ya kujua mambo ya baadaye, lakini hajamjalia fursa ya kuelewa matendo yake Mungu tangu mwanzo mpaka mwisho.

¹²Najua kwamba, kwa binadamu, liko jambo moja tu la kumfaa; kufurahi na kujifurahisha muda wote aishipo.

¹³Sote inatupasa kula na kunywa na kufurahia matunda ya kazi zetu. Hayo ni majaliwa ya Mungu.

¹⁴Najua kwamba lolote atendalo Mungu linadumu milele. Hakuna kinachoweza kuongezwa wala kupunguzwa; Mungu amefanya mambo yawe hivyo kusudi wanadamu wamche yeye.

¹⁵Kinachotukia sasa, kilikwisha tukia; kitakachotukia baadaye kilikwisha tukia; na Mungu hukifanya kitu kilekile kitukie tena na tena.

¹⁶Zaidi ya hayo, nimegundua duniani kwamba, mahali pa haki na uadilifu, uovu unatawala.

¹⁷Basi, nikasema moyoni mwangu, “Haidhuru! Mungu atawahukumu waadilifu, hali kadhalika na waovu, maana amepanga wakati maalumu kwa kila jambo na kwa kila kazi.”

¹⁸Nikasema moyoni mwangu, “Mungu anawajaribu binadamu, ili kuwaonesha kwamba wao ni sawa tu na wanyama.”

¹⁹Mwisho wa binadamu na mwisho wa mnyama ni uleule. Jinsi anavyokufa binadamu ndivyo anavyokufa mnyama. Wote hupumua namna ileile; binadamu si bora kuliko mnyama. Kwao yote ni bure kabisa.

²⁰Wote hufa na kwenda mahali pamoja. Wote wametoka mavumbini; na wote watarudi mavumbini,

²¹Nani ajuaye, basi, kama kweli roho ya mtu hupaa juu, na roho ya mnyama hudidimia chini ardhini?

²²Ndipo nikatambua kwamba hakuna jambo lililo bora zaidi kwa binadamu kufanya kuliko kufurahia kazi yake, kwa sababu amepangiwa hivyo. Nani awezaye kumjulisha binadamu yale yatakayokuwa baada ya kufa kwake?