Read Swahilli Sira 17 Bible Online

Sira 17 - Swahilli bible

Sira 17

¹Bwana aliumba binadamu kwa udongo na hukohuko udongoni binadamu atarudi.

²Aliwapangia binadamu siku za kuishi, na kuwapa mamlaka juu ya vitu vyote duniani.

³Aliwapa nguvu kama zake mwenyewe, aliwaumba kwa mfano wake.

⁴Alivifanya viumbe vyote vimwogope binadamu, akawapa binadamu mamlaka juu ya wanyama na ndege. [

⁵Bwana aliwapa milango mitano ya maarifa, lakini pia aliwapa mlango wa sita, yaani akili na mlango wa saba, yaani uwezo kwa kutumia kufikiri. Kwa njia ya milango hiyo wanaweza kutafsiri yale yanayowajia.]

⁶Aliwapa binadamu ndimi, macho na masikio, akawapa na moyo wa kuweza kufikiri.

⁷Aliwajaza maarifa na akili, akawaonesha yaliyo mema na mabaya.

⁸Alisimika jicho lake ndani yao, ili kuwawezesha kuona uzuri wa kazi zake, [

⁹na akawaruhusu kujivunia maajabu yake milele.]

¹⁰wapate kulisifu jina lake takatifu, na kutangaza ukuu wa kazi zake.

¹¹Aliweka mbele yao elimu, na kuwajalia sheria ya uhai.

¹²Alifanya nao agano la milele, na kuwafunulia maamuzi yake.

¹³Macho yao yakaona utukufu wake, na masikio yao yakasikia utukufu wa sauti yake.

¹⁴Aliwaambia, “Msifanye uovu wowote;” akawaamuru namna ya kuishi na jirani zao.

¹⁵Bwana anaiona mienendo ya binadamu; hawawezi kujificha mbele yake. [

¹⁶Tabia yao tangu utoto unaelekea uovu. Hawana nguvu ya kuigeuza mioyo yao iliyo kama mawe iwe mioyo ya mtu.]

¹⁷Aliweka mtawala juu ya kila taifa, lakini Israeli ni mali yake Bwana binafsi. [

¹⁸Israeli ni mzaliwa wake wa kwanza, ambaye anamlea na kumpa nidhamu, bila kumwacha.]

¹⁹Matendo yote ya watu ni wazi kwa Bwana kama jua, kila wanachofanya anakiona mbele yake.

²⁰Maovu ya binadamu hayawezi kufichika mbele yake, dhambi zao ziko wazi mbele ya Bwana. [

²¹Lakini Bwana ni mwenye neema na anavijua viumbe vyake; hivyo anavihurumia na kamwe hajavitupa.]

²²Sadaka kwa maskini ni kama mhuri kwake, yeye huthamini wema wa mtu kama mboni ya jicho lake.

²³Baadaye atatokea na kuwalipiza waovu; watapata kila mmoja wanachostahili.

²⁴Lakini wale wanaotubu atawajalia wamrudie, na huwatia moyo wale waliokata tamaa.

²⁵Mgeukie Bwana na kuacha dhambi zako; omba mbele yake na uache makosa yako.

²⁶Mrudie Mungu Mkuu na kuachana na uovu; uchukie kwa moyo wote kufanya machukizo.

²⁷Huko kuzimu nani atamwimbia sifa Mungu Mkuu? Ni wale tu walio hai wanaoweza kumshukuru.

²⁸Waliokufa na wasiokuwako tena hawawezi kumsifu; ni wale walio hai na wazima ndio wanaoweza kumsifu Bwana.

²⁹Jinsi gani huruma ya Bwana ilivyo kuu, na jinsi anavyowasamehe wanaomrudia!

³⁰Sisi binadamu hatuwezi kuwa na kila kitu; maana sisi sote ni viumbe vyenye kufa.

³¹Ni kitu gani kingaacho kama jua? Hata hivyo, jua nalo hupatwa. Binadamu aliye kiumbe hufikiria tu maovu.

³²Bwana hulikagua jeshi lote la mbinguni, lakini binadamu ni mavumbi tu na majivu!