Read Swahilli Sira 26 Bible Online

Sira 26 - Swahilli bible

Sira 26

¹Heri mume aliye na mke mwema siku za maisha yake zitaongezwa maradufu.

²Mke mwaminifu ni furaha ya mumewe; mumewe ataishi kwa amani miaka yote.

³Mke mwema ni baraka kubwa; baraka anayopewa mume amchaye Bwana.

⁴Mtu kama huyo, awe tajiri au maskini, daima ana furaha moyoni; na wakati wote ni mwenye uso mkunjufu.

⁵Moyo wangu unayaogopa mambo matatu, na la nne linanitisha: Uvumi mbaya mjini, genge la waovu, na mashtaka ya uongo. Hayo yote ni mabaya kuliko kifo.

⁶Lakini daima kuna masikitiko na huzuni moyoni mke anapomwonea wivu mke mwenzake, na ulimi wake kumshambulia kila mtu.

⁷Mke mwovu ni kama nira inayokwaruza shingoni; kujaribu kumtawala ni sawa na kushika nge.

⁸Mke aliyelewa husababisha hasira, hawezi kuficha aibu yake.

⁹Mwanamke malaya huonekana katika macho yake, naye hujulikana kwa kope zake.

¹⁰Uwe mkali kwa binti aliye na ukaidi, la sivyo, akipata nafasi tu, ataitumia kujiumiza mwenyewe.

¹¹Jihadhari na macho yake yasiyo na haya, wala usishangae akikukosea.

¹²Kama vile msafiri mwenye kiu afunuavyo kinywa chake na kunywa maji yoyote ayaonayo, ndivyo na binti huyo atakavyoketi kila mahali na kujifunua kwa kila mwanamume apitaye hapo.

¹³Mke mzuri humfurahisha mumewe, na ujuzi wake humfanya awe na nguvu.

¹⁴Mke mkimya ni zawadi kutoka kwa Bwana, hakuna bei ya kufaa kulingana naye.

¹⁵Mke mwenye kiasi hupendeza zaidi na zaidi, hakuna kipimo kinachoweza kumpima mke mwenye tabia nzuri.

¹⁶Kama vile pambazuko la jua katika anga la Bwana ndivyo ulivyo uzuri wa mke mwema na nyumba yake nadhifu.

¹⁷Kama vile taa iwakavyo juu ya kinara kitakatifu, ndivyo ulivyo uzuri wa uso wake na umbo lake.[22]

¹⁸Na kama nguzo za dhahabu juu ya vikalio vya fedha ndivyo ilivyo miguu yake mizuri, juu ya nyayo imara. [

¹⁹Mwanangu, hifadhi nguvu za ujana wako, wala usiwape wageni nguvu zako.

²⁰Jitafutie nchini kote eneo lenye rutuba, ukapande humo mbegu yako mwenyewe, ukitumainia kuwa na ukoo wako bora.

²¹Hivyo watoto wako mwenyewe wataishi, watakuwa mashuhuri, wakiwa na matumaini ya malezi bora.

²²Mwanamke malaya ni kama mate; mke mtembezi ni kama mlingoti wa kifo.

²³Mwanamke asiyemcha Mungu amepangiwa mume mkosefu, lakini mwema amepangiwa mume mcha Mungu.

²⁴Mke asiye na aibu hufurahi kujiaibisha, lakini mke mwenye kiasi ana haya hata mbele ya mumewe.

²⁵Mwanamke mkaidi ni sawa na mbwa, lakini mwenye haya humcha Bwana.

²⁶Mke anayemheshimu mumewe kila mtu atamwona ana hekima, lakini anayemdharau kwa majivuno wote watamwona kuwa mwovu. Heri mume aliye na mke mwema maana siku za maisha yake zitakuwa maradufu.

²⁷Mke wa makelele, mwenye kueneza uvumi, ni kama tarumbeta ya vita; na mume aliyejifunga na mke wa namna hiyo maisha yake ni vita.]

²⁸Yako mambo mawili yanayonihuzunisha moyoni na jambo la tatu lanikasirisha: Askari ambaye amefilisika, watu wenye akili wanaodharauliwa, na mtu anayeacha unyofu na kutenda dhambi. Huyo Bwana atamwadhibu kwa upanga.

²⁹Ni vigumu kwa mfanyabiashara kuepa makosa, na mchuuzi kuepa dhambi.