Read Swahilli Sira 29 Bible Online

Sira 29 - Swahilli bible

Sira 29

¹Mwenye huruma humkopesha jirani yake; kumsaidia jirani ni kutimiza amri.

²Mkopeshe jirani yako anapohitaji msaada, na ukimkopa jirani yako, mlipe mara.

³Tekeleza neno lako na kuwa na imani naye, nawe utapata mahitaji yako kila wakati.

⁴Wengi hudhani mikopo ni zawadi, na kuwaaibisha hao waliowasaidia.

⁵Mtu atabusu mkono wa mtu mwingine mpaka amkopeshe, na kunongoneza juu ya mali ya jirani yake. Lakini wakati wa kulipa mkopo atachelewa, atalipa kwa maneno mengi matupu na kudai kukosekana kwa wakati.

⁶Kama anaweza kulipa, atamlipa labda nusu, kwani mkopaji anadhani mkopo si wa kulipa. Kama hawezi kulipa, mkopaji amemwibia, na hivyo amemfanya kuwa adui yake bure. Atamlipa laana na matukano; badala ya kumheshimu atamlipa madharau.

⁷Kwa sababu hiyo, wengi hukataa kukopesha, wanaogopa kudhulumiwa bure.

⁸Hata hivyo, uwe na uvumilivu kwa mtu aliye maskini, wala usimfanye angoje mno kupata msaada wako.

⁹Msaidie maskini kwani hiyo ni amri, kama anahitaji, usimwache aende mikono mitupu.

¹⁰Tumia fedha yako kumsaidia ndugu au rafiki, wala usiiache ipate kutu mafichoni na kupotea.

¹¹Tumia utajiri wako kama alivyoamuru Mungu Mkuu nawe utapata faida kubwa kuliko dhahabu.

¹²Jaza hazina yako misaada kwa maskini, hiyo itakuokoa wakati wa maafa.

¹³Hiyo itakupigania dhidi ya adui yako, vizuri kuliko kwa ngao kubwa na mkuki mzito.

¹⁴Mtu mwema atamwekea jirani yake dhamana, lakini mtu asiye na aibu atamwacha.

¹⁵Usisahau wema wa mdhamini wako, maana ameyahatarisha maisha yake kwa ajili yako.

¹⁶Lakini mtu mwenye dhambi ataharibu mali ya mdhamini wake, mtu asiye na shukrani atamwacha yule aliyemwokoa.

¹⁷Kutoa dhamana kumewaangamiza matajiri wengi, na kuwatikisa kama kwa mawimbi makubwa.

¹⁸Kutoa dhamana kumewafanya watu wengi maarufu kuwa wakimbizi, wakatangatanga miongoni mwa mataifa mengine.

¹⁹Mwenye dhambi anayekubali kuwa mdhamini atajuta, atatafuta faida na kujikuta amekabiliwa na sheria.

²⁰Msaidie jirani yako kadiri unavyoweza, lakini uchukue hadhari usije ukaanguka katika maafa.

²¹Mahitaji ya maisha ni maji, chakula na mavazi, na nyumba unakoweza kujificha.

²²Afadhali maisha ya maskini mwenye nyumba yake mwenyewe, kuliko chakula cha fahari nyumbani kwa wengine.

²³Ridhika na kidogo ulicho nacho, nawe hutakemewa kuwa unaishi kwa jasho la wengine.

²⁴Ni fedheha kutangatanga nyumba moja hata nyingine, popote ulipo mgeni huwezi kufungua kinywa chako;

²⁵wewe utakuwa mgeni na kuonja kunyenyekeshwa, tena utasikia maneno yatakayokuumiza:

²⁶“Mgeni, njoo hapa na kuandaa meza! Na kama una chochote, nipe nile.

²⁷Mgeni, nenda zako umwachie nafasi mtu maarufu. Ndugu yangu anakuja kwangu, nahitaji nyumba yangu.”

²⁸Mambo ya kutukanwa kuhusu malazi na mkopo, hayavumiliki kwa mtu mwenye akili zake.