Read Swahilli Sira 3 Bible Online

Sira 3 - Swahilli bible

Sira 3

¹Wanangu sikilizeni mawaidha ya baba yenu. Fanyeni ninayowaambia, nanyi mtawekwa salama,

²maana Bwana amewapa kina baba mamlaka juu ya watoto wao, na kuimarisha uwezo wa kina mama juu ya watoto wao.

³Anayemheshimu baba yake anajipatia msamaha wa dhambi zake.

⁴Anayemheshimu mama yake anajiwekea hazina kubwa.

⁵Anayemheshimu baba yake atafurahishwa na watoto wake mwenyewe, na atakapomwomba Bwana, atasikilizwa.

⁶Anayemheshimu baba yake atapata maisha marefu, anayempendeza mama yake anamtii Bwana.

⁷Mtoto huyo, huwatumikia wazazi wake kama Bwana wake.[1]

⁸Mheshimu baba yako kwa maneno na matendo, ili upate baraka kutoka kwake.

⁹Maana baraka za baba huimarisha nyumba za watoto, hali laana ya mama huingoa misingi ya nyumba zao.

¹⁰Usijikuze mwenyewe kwa kumdharau baba yako. Maana kumdharau baba yako hakutakuletea faida.

¹¹Maana fahari ya baba mtu ni fahari ya huyo mtoto, na watoto wasiomheshimu mama yao ni balaa.

¹²Mwanangu, mtunze baba yako alipo mzee wala usimhuzunishe muda wote aishipo.

¹³Hata akipungukiwa akili, umvumilie. Usimdharau kwa vile wewe una afya na nguvu.

¹⁴Bwana hatasahau wema wako kwa baba yako, utakusaidia kukupatia msamaha wa dhambi zako.

¹⁵Wakati wa taabu Bwana atakumbuka wema wako. Kama umande kwenye jua, dhambi zako zitatoweka.

¹⁶Anayemtupa baba yake anamkufuru Mungu; anayemkasirisha mama yake analaaniwa na Bwana.

¹⁷Mwanangu, uwe mpole katika shughuli zako, nawe utapendwa na wale wanaokubaliwa na Mungu.

¹⁸Kadiri ulivyo mkuu, ndivyo unavyotakiwa kunyenyekea; na hapo utapata kibali cha Bwana. [

¹⁹Wengi hujitukuza na kujiona bora, lakini siri za Mungu hufunuliwa kwa wanyenyekevu. Makala ya Kiebrania: Huruma za Mungu ni kubwa, naye huwafunulia wanyenyekevu siri zake.]

²⁰Nguvu ya Bwana ni kuu lakini hutukuzwa na wanyenyekevu.

²¹Usitafute yaliyo magumu mno kwako, wala kuchunguza yaliyo nje ya uwezo wako.

²²Zingatia yale uliyopangiwa kufanya, huhitaji kujihangaisha juu ya mambo yaliyofichika

²³Usiingilie mambo yanayopita nguvu zako maana hata hayo uliyooneshwa yanapita akili ya binadamu.

²⁴Maana wengi wamepotoshwa kwa kujiona kuwa wajuzi sana, maoni yao ya utundu yamepotosha akili zao. [

²⁵Kama huna macho huwezi kuona; usijitakie kuwa na akili kama hunayo.]

²⁶Mwenye kiburi ataishia vibaya mwishoni; na apendaye hatari ataangamia huko.

²⁷Mwenye kiburi atalemewa taabu; mwenye dhambi hujirundikia dhambi mfululizo.

²⁸Mateso ya mwenye kiburi hayana matibabu. Maana uovu umeota na kutia mzizi ndani yake.

²⁹Mwenye akili atazitafakari methali moyoni mwake; kuwa mtu msikivu ndicho atakacho mwenye busara.

³⁰Kama vile maji yazimavyo moto mkali ndivyo na sadaka kwa maskini iletavyo msamaha wa dhambi.

³¹Amwoneaye huruma mwenzake hufikiria mbele, wakati atakapopata taabu atasaidiwa.