Read Swahilli Sira 33 Bible Online

Sira 33 - Swahilli bible

Sira 33

¹Hakuna baa lolote litakalompata mtu amchaye Bwana; wakati wa majaribu Bwana atamwokoa tena na tena.

²Mwenye hekima hataichukia sheria, lakini mnafiki juu ya sheria ni kama mashua kwenye mawimbi.

³Mwenye busara atakuwa na imani na sheria, kwake sheria ni ya kutegemewa kama kauli ya Mungu.

⁴Tayarisha utakachosema nawe utasikilizwa; panga pamoja unayoyajua kisha ujibu.

⁵Moyo wa mpumbavu ni kama gurudumu la mkokoteni, na mawazo yake kama kizungukio.

⁶Rafiki mwenye mizaha ni kama farasi; kila anayempanda farasi hutoa sauti.

⁷Kwa nini siku moja ni bora kuliko nyingine hali zote zinapata mwanga wake kutoka kwa jua?

⁸Bwana ndiye aliyeamua kuzitofautisha, na kuweka majira mbalimbali na sikukuu.

⁹Siku nyingine alizikuza na kuzitakasa, na nyingine alizifanya ziwe za kawaida tu.

¹⁰Binadamu wote wametoka udongoni, naye Adamu aliumbwa kutoka mavumbini.

¹¹Lakini, Bwana kwa hekima yake kamili aliwatofautisha, na kila mmoja wao akampa jukumu tofauti.

¹²Baadhi yao aliwabariki na kuwakuza, baadhi aliwafanya watakatifu na kuwaweka karibu naye. Lakini wengine aliwalaani na kuwashusha, akawaondoa kutoka mahali pao.

¹³Kama udongo mikononi mwa mfinyanzi ambaye huufinyanga atakavyo, ndivyo walivyo binadamu mikononi mwake aliyewaumba: Yeye huwafanya kama anavyoamua.

¹⁴Wema ni kinyume cha uovu, na uhai ni kinyume cha kifo, ndivyo na mwenye dhambi ni kinyume cha mcha Mungu.

¹⁵Angalia kazi zote za Mungu Mkuu: Ziko mbilimbili, kimoja kinyume cha kingine.

¹⁶Mimi, nimekuwa wa mwisho kuyaangalia hayo, kama mtu anayeokota zabibu baada ya wavunaji kupita.

¹⁷Lakini Bwana amenibariki sana, nikawazidi wote; kama vile mvunazabibu nimejaza kinu cha kusindikia.

¹⁸Kumbuka sikufanya kazi kwa ajili yangu tu, bali kwa ajili ya wote wanaotaka kujifunza.

¹⁹Nisikilizeni enyi wakuu kati ya watu; nanyi viongozi wa jumuiya, nisikilizeni.

²⁰Muda wote uishipo usimwachie mtoto, mke, ndugu au rafiki akutawale; usimpe mtu mwingine mali yako, usije ukabadili nia na kuomba urudishiwe.

²¹Ungali bado hai, unapumua, usikubali mtu mwingine achukue nafasi yako.

²²Maana ni afadhali watoto wako wakutegemee, kuliko wewe kuwategemea wao.

²³Fanya kila kitu ufanyacho vizuri kabisa, usiitie dosari heshima yako.

²⁴Mwisho wa maisha yako, wakati wa saa yako ya mwisho, gawa mali yako.

²⁵Nyasi, mzigo na kiboko kwa punda, chakula, nidhamu na kazi kwa mtumwa.

²⁶Mpe mtumwa wako kazi nawe utapata pumziko, mwache bila kazi naye atataka uhuru.

²⁷Mtiishe mnyama kwa nira na lijamu, na mtumwa mwovu kwa mateso.

²⁸Mpe kazi ili asiwe mvivu, maana uvivu huwafunza watu uovu mwingi.

²⁹Mpe kazi kama inavyostahili kwako, na kama hakutii, mfunge minyororo.

³⁰Usimtendee mtu yeyote bila kiasi, wala usifanye chochote bila busara.

³¹Ukiwa na mtumwa na awe kama wewe, kwa sababu umemnunua kwa jasho lako.

³²Ukiwa na mtumwa, mtendee kama ndugu yako, maana utamhitaji kama unavyohitaji roho yako.

³³Ukimtendea vibaya akakukimbia, utafuata njia ipi kumtafuta?