Read Swahilli Sira 34 Bible Online

Sira 34 - Swahilli bible

Sira 34

¹Mtu mjinga huwa na matumaini ya bure na ya uongo; ndoto humpa mpumbavu mabawa ya kuruka.

²Kama mtu anayejaribu kushika kivuli na kufukuza upepo ndivyo alivyo mtu anayeamini ndoto.

³Ndoto ni kama kioo, sura inayoukabili uso.

⁴Ni kitu gani kiwezacho kutakaswa na uchafu? Je, ukweli waweza kupatikana kwa uongo?

⁵Kupiga bao, ramli na ndoto ni upuuzi; akili huwa na mawazo kama ya mama anayejifungua.

⁶Usizitie maanani ndoto isipokuwa kama zimetoka kwa Mungu Mkuu.

⁷Maana ndoto zimewadanganya wengi, na wale wanaozitumaini wameaibishwa.

⁸Sheria ni kamilifu bila udanganyifu huo, nayo hekima ni kamilifu kwa mtu mwaminifu:

⁹Mtu aliyesafiri sana anajua mengi, na mtu mzoefu wa mengi anajua anachoongea.

¹⁰Mtu ambaye hajakumbana na matatizo hajui mengi, lakini aliyesafiri sana amejipatia maarifa.

¹¹Katika safari zangu nimeona mengi; ninajua mengi kuliko niwezavyo kuyaeleza.

¹²Mara nyingi nimekuwa katika hatari ya kifo, lakini nimechopoka kwa sababu ya maarifa haya.

¹³Wamchao Bwana wataishi, maana tumaini lao liko kwake yeye anayewaokoa.

¹⁴Amchaye Bwana hatakuwa na woga, hawezi kuogopa kwani Bwana ndiye tumaini lake.

¹⁵Heri mtu ambaye anamcha Bwana! Maana anamtazamia yeye amtegemeze.

¹⁶Bwana huwaangalia kwa wema wale wampendao. Yeye ni ngao imara na tegemeo lao thabiti; yeye ni kinga yao mbali na upepo mkali, ni kivuli chao wakati wa jua kali; yeye huwalinda wasijikwae, huwasaidia wasianguke.

¹⁷Bwana huijaza mioyo furaha, na huyatia macho mwanga. Yeye huwapa watu afya, uhai na baraka

¹⁸Mtu akitoa sadaka kitu kilichopatikana kwa udanganyifu tambiko yake hiyo ina dosari. Zawadi za wasiotii sheria hazikubaliki.

¹⁹Mungu Mkuu hakubali sadaka za wasiomcha, wala wingi wa sadaka hauwezi kuleta upatanisho.

²⁰Mtu atoaye sadaka kitu alichomnyanganya maskini, ni sawa na mtu anayemuua mtoto mbele ya baba yake.

²¹Chakula cha maskini ni uhai wake; yeyote anayempora maskini chakula ni muuaji.

²²Kumnyanganya jirani chakula chake ni kumuua; na kumnyanganya mwajiriwa mshahara wake ni kuua.

²³Mtu mmoja akijenga na mwingine akibomoa, je, wamefanikiwa chochote ila kutoa jasho?

²⁴Mmoja akimwomba Mungu na mwingine akilaani, je, Bwana ataisikiliza sauti ya nani?

²⁵Mtu akitawadha baada ya kushika maiti, akaishika tena, je, amepata faida gani kwa kutawadha kwake?

²⁶Hivyo mtu akifunga kwa ajili ya dhambi zake, kisha akaenda kufanya mambo yaleyale, ni nani atakayesikiliza sala yake? Tena amepata faida gani kwa kujinyenyekesha?