Read Swahilli Sira 37 Bible Online

Sira 37 - Swahilli bible

Sira 37

¹Kila mtu anaweza kudai, “Mimi pia ni rafiki yako.” Lakini rafiki wengine ni rafiki kwa jina tu.

²Je, si pigo la kifo ndugu au rafiki akiwa adui?

³Ee mwelekeo wa uovu, kwa nini umeumbwa hata ukaijaza dunia kwa udanganyifu?

⁴Baadhi ya ndugu hufurahia furaha ya rafiki, lakini, wakati wa taabu humwacha.

⁵Wengine humsaidia rafiki kwa ajili ya chakula, lakini vita vikitokea, hujikinga wao wenyewe.

⁶Usimsahau rafiki yako wa kweli; na unapokuwa tajiri usimfute moyoni mwako.

⁷Kila mshauri atatoa ushauri, lakini wengine hutoa ushauri kwa faida yao.

⁸Uwe mwangalifu juu ya mshauri, ukachunguze kwanza anachotaka, maana huenda anajifikiria yeye mwenyewe tu. Huenda amekwisha fanya mpango dhidi yako.

⁹Huweza kusema: “Mambo yote ni sawa”, halafu akasimama mbali kuona yatakayokupata.

¹⁰Usiombe ushauri kwa mtu unayemwonea mashaka, na usimpe ushauri mtu anayekuonea wivu.

¹¹Usiombe ushauri kwa mwanamke kuhusu mpinzani wake, usiombe ushauri kwa mwoga kuhusu vita, kwa mfanyabiashara kuhusu biashara, kwa mnunuzi kuhusu uuzaji wa mali, kwa mtu bahili kuhusu ukarimu, kwa mtu mkatili kuhusu upole; kwa mtu mvivu kuhusu kazi, kwa kibarua kuhusu kumaliza kazi, au kwa mtumwa mvivu kuhusu kazi ngumu. Usiwajali watu wa namna hiyo, kuhusu jambo la kupata ushauri.

¹²Lakini uwe na uhusiano daima na mcha Mungu, ambaye unajua anatii amri, yeye nawe mnapatana, naye atahuzunika nawe ukishindwa.

¹³Utegemee sana shauri la moyo wako; maana hakuna aliye mwaminifu kuliko moyo wako.

¹⁴Moyo wa mtu mara nyingi humpa mawaidha mema kuliko yale ya walinzi saba wanaolinda zamu mnarani.

¹⁵Zaidi ya hayo, mwombe Mungu Mkuu ili aiongoze njia yako katika ukweli.

¹⁶Busara iwe ndio msingi wa kila tendo, na shauri hutangulia shughuli yoyote.

¹⁷Mawazo yote yamo moyoni, na kutoka humo namna nne huonekana:

¹⁸Wema na uovu, uhai na kifo; na mtawala wa hayo daima ni ulimi.

¹⁹Mtu aweza kuwa na busara na mwalimu wa wengi, lakini asiwe na faida kwake mwenyewe.

²⁰Mtu aliye hodari wa kusema aweza kuchukiwa, hata akakosa chakula kabisa,

²¹maana hakupewa neema na Bwana, kwa vile hana hekima yoyote.

²²Mwingine ana hekima kwa faida yake mwenyewe, na maneno yake akayaona yeye mwenyewe kuwa hakika.

²³Mwenye hekima atawafunza watu wake, na matokeo ya maarifa yake yatakuwa hakika.

²⁴Mwenye hekima atapewa sifa kwa wingi, na wote watakaomwona watamwita mwenye bahati.

²⁵Siku za maisha ya mtu zimehesabiwa, lakini siku za Israeli hazihesabiki.

²⁶Mwenye hekima atajipatia heshima kwa watu wake, na jina lake litadumu milele.

²⁷Mwanangu, jipime nafsi yako ungali hai; ona ni kitu gani kibaya kwako, ukiepe.

²⁸Maana si kila kitu kinafaa kwa kila mtu, wala si kila mtu anafurahia kila kitu.

²⁹Usiwe mwenye uchu wa kila anasa, wala usiwe mtumwa wa chakula.

³⁰Maana kula mno huleta ugonjwa, ulafi huleta kichefuchefu.

³¹Wengi wamekufa kwa sababu ya ulafi, anayekwepa ulafi, atarefusha maisha yake.