Read Swahilli Sira 4 Bible Online

Sira 4 - Swahilli bible

Sira 4

¹Mwanangu, usimpunje maskini mahitaji yake, usimtamanishe bure mtu aliye fukara.

²Usimhuzunishe mtu mwenye njaa, au kumkasirisha mtu mwenye shida.

³Usimzidishie matatizo mtu mwenye taabu, wala usicheleweshe sadaka yako kwa maskini mwombaji.

⁴Usikatae kumsaidia mwombaji aliye na taabu, wala usimpe kisogo maskini.

⁵Usiepe kumwangalia mtu fukara, usimpe nafasi ya kukulaani.

⁶Maana akikulaani katika uchungu alio nao, Muumba wake ataisikia sala yake.

⁷Ifanye jumuiya ya watu ipendezwe nawe; inama kichwa kwa heshima mbele ya wakuu.

⁸Tega sikio, umsikie mtu maskini, na kuitikia salamu yake kwa upole.

⁹Mkomboe anayedhulumiwa makuchani mwa mdhalimu, wala usiyumbeyumbe unapotoa hukumu.

¹⁰Uwe baba kwa walio yatima, na kama mume kwa mama zao wajane. Hapo utakuwa mwana wa Mungu Mkuu naye atakupenda kuliko akupendavyo mama yako.

¹¹Hekima huwatukuza wanawe, na kuwasaidia wale wanaomtafuta.

¹²Ampendaye Hekima, anapenda maisha; wamtafutao Hekima mapema, watajazwa furaha.

¹³Anayeambatana naye atapata heshima, na Bwana atapabariki mahali anapokwenda.

¹⁴Wanaomtumikia Hekima, wanamtumikia Mungu Mtakatifu; Bwana huwapenda wale wanaompenda Hekima.

¹⁵Anayemtii Hekima atayahukumu mataifa, anayemsikia Hekima ataishi kwa usalama.

¹⁶Aliye mwaminifu atampata Hekima, na wazawa wake wataendelea kuwa naye.

¹⁷Maana ingawa atampitisha kwanza katika njia za taabu na kumletea hofu na hali ya woga, akimjaribu kwa nidhamu mpaka amwamini, na kumpima kwa kumletea maafa;

¹⁸baadaye humjia moja kwa moja na kumfurahisha na kumjulisha siri zake.

¹⁹Lakini mtu huyo akikosea, ataondoka kwake, na kumwacha kwenye maangamizi yake mwenyewe.

²⁰Chukua tahadhari wakati ufaao na kuepa uovu, wala usijiletee aibu kwako mwenyewe.

²¹Maana kuna aibu inayoongoza katika dhambi, lakini kuna aibu ambayo huleta sifa na heshima.

²²Usioneshe ubaguzi kwa hasara yako au upendeleo na kujiangamiza wewe mwenyewe.

²³Usiache kusema wakati unaofaa, wala usifiche hekima yako.

²⁴Maana hekima yako yajulishwa kwa yale unayosema, na busara yako kwa maneno unayotamka.

²⁵Usiupinge ukweli, bali uwe na tahadhari juu ya kutojua kwako.

²⁶Usione aibu kuungama dhambi zako, usijaribu kupinga mkondo wa mto.

²⁷Usikubali kutawaliwa na mtu mpumbavu, wala kumpendelea mtawala.

²⁸Pigania ukweli hata mpaka kifo, naye Bwana Mungu atakupigania.

²⁹Usiwe ovyo katika usemi wako, wala mzembe katika matendo yako.

³⁰Usiwe kama simba nyumbani kwako, wala mwenye kuwatuhumu watumishi wako.

³¹Usiwe mtu wa kupokea tu, wala kuwa mgumu wa kuwapa wengine.