Read Swahilli Sira 40 Bible Online

Sira 40 - Swahilli bible

Sira 40

¹Majukumu magumu yaliumbwa kwa ajili ya binadamu wote, mzigo mzito uko juu ya wanaadamu tangu walipozaliwa mpaka watakaporudi kwao mavumbini, ambayo ni mama wa watu wote.

²Wasiwasi wao, hofu ya moyoni, na woga wao ni juu ya siku ya kufa.

³Hayo huwapata wote: Tangu mfalme katika fahari yake, mpaka mnyonge anayeketi mavumbini na katika majivu;

⁴tangu tajiri na mavazi yake ya zambarau na taji kichwani, mpaka yule maskini avaaye magunia.

⁵Kila kitu ni hasira na wivu, shida na wasiwasi, hofu ya kifo, uadui na ugomvi. Hata mtu anapolala kitandani mwake usingizi wake huvuruga mawazo yake.

⁶Hulala usingizi kidogo au halali kabisa; na akiwa amelala, huwa kama yu macho. Husumbuliwa na maono akilini mwake, kama mtu aliyetoroka mstari wa mbele vitani.

⁷Wakati wa kuokolewa, huamka, akashangaa kwamba hofu zake hazikuwa kweli.

⁸Ndivyo ilivyo kwa viumbe wote, binadamu na wanyama, na kwa wenye dhambi ni mara saba:

⁹Kila mara kifo, umwagaji damu, mapigano na vita, maafa, njaa, mateso na tauni.

¹⁰Hayo yote yaliumbwa kwa ajili ya wenye dhambi, na kwa sababu ya waovu gharika ilikuja.

¹¹Vitu vyote vilivyotoka ardhini vitarudi ardhini, kama vile maji yote hurudi baharini.

¹²Kila rushwa na udhalimu, vitafutwa, lakini imani njema itadumu milele.

¹³Mali ya waovu itakauka kama kijito, itapondeka kwa kishindo kama ngurumo wakati wa mvua nyingi.

¹⁴Mtu mkarimu atapata furaha, lakini wakosefu wataangamia kabisa.

¹⁵Watoto wa wasiomcha Mungu hawatakuwa na chipukizi, wao ni kama mizizi dhaifu kwenye mwamba mtupu.

¹⁶Matete yaliyo kando ya maji au mto, hayo ndiyo yatakayongolewa kabla ya nyasi nyingine.

¹⁷Wema ni kama bustani iliyojaa baraka, na sadaka kwa maskini hudumu milele.

¹⁸Kwa anayejitegemea na mfanyakazi maisha ni mazuri; lakini bora kuliko hiyo ni mtu anayegundua hazina.

¹⁹Kuwa na watoto na kujenga mji humpatia mtu jina, lakini mke asiye na hatia ni bora kuliko hivyo viwili.

²⁰Pombe na muziki hufurahisha moyo, lakini kuipenda hekima ni bora kuliko hivyo viwili.

²¹Filimbi na kinanda hutoa muziki mtamu, lakini sauti ya kupendeza ni bora zaidi.

²²Macho hufurahia urembo na uzuri wa mtu, lakini uzuri wa chipukizi za mbegu ni bora zaidi.

²³Rafiki na ndugu hufaa sana, lakini kupatana kwa mke na mumewe ni bora zaidi.

²⁴Kuwa na ndugu na msaada wakati wa shida ni vizuri, lakini kuwasaidia maskini huokoa kuliko hivyo.

²⁵Dhahabu na fedha humfanya mtu imara, lakini shauri jema lathaminiwa kuliko hivyo viwili.

²⁶Mali na nguvu humfanya mtu kuwa thabiti, lakini kumcha Bwana ni bora zaidi. Hakuna dosari katika kumcha Bwana, na ukiwa na kipaji hicho huhitaji msaada.

²⁷Kumcha Bwana ni kama bustani ya baraka, nayo humlinda mtu kuliko fahari yoyote.

²⁸Mwanangu usiishi maisha ya kuombaomba, ni afadhali kufa kuliko kuombaomba.

²⁹Mtu anapomtegemea mwingine ampe chakula, anaishi maisha ambayo hayastahili utu. Kutegemea chakula cha mwingine ni kujiaibisha; mtu mwenye akili, aliyefunzwa vema ataepa kuishi hivyo.

³⁰Kwa mtu asiye na aibu kuombaomba ni kutamu, lakini ndani yake kuna moto unaomchoma.