Read Swahilli Sira 50 Bible Online

Sira 50 - Swahilli bible

Sira 50

¹Aliyekuwa mkuu wa ndugu zake na fahari ya watu wake, ni Simoni, kuhani mkuu, mwana wa Onia. Katika maisha yake alilijenga upya hekalu, na kulijengea ngome.

²Aliweka msingi wa kuta mbili za ua wa hekalu.

³Wakati wake kisima cha maji kilichimbwa, hifadhi ya maji kubwa kama bahari.

⁴Alifikiria namna ya kuwaokoa watu wasiangamie, akauimarisha mji kuukinga na mashambulizi.

⁵Jinsi gani alivyoheshimika akizungukwa na watu, alipokuwa akitoka mahali patakatifu ndani.

⁶Alikuwa kama nyota ya asubuhi mawinguni, alikuwa kama mwezi mpevu.

⁷Alikuwa kama jua linapoangaza juu ya hekalu la Mungu Mkuu, kama upinde wa mvua unaongara katika mawingu.

⁸Alikuwa kama waridi wakati wa mazao ya kwanza, kama yungiyungi kando ya kijito, kama chipukizi mlimani Lebanoni wakati wa kiangazi,

⁹kama ubani katika moto ndani ya chetezo, kama chombo cha dhahabu iliyofuliwa, kilichopambwa kwa kila aina ya mawe ya thamani.

¹⁰Alikuwa kama mzeituni unapotoa matunda yake, kama mberoshi mrefu mpaka mawinguni.

¹¹Alipovaa mavazi yake ya fahari, alipokwenda kwenye madhabahu matakatifu, akiwa amevalia mavazi yake kikamilifu, aliufanya ukumbi wa hekalu uwe na utukufu.

¹²Makuhani walipompa mafungu yake ya tambiko, akiwa amesimama karibu na madhabahu, amezungukwa na ndugu zake kama taji, alikuwa kama mwerezi mchanga mlimani Lebanoni. Ndugu zake walimzunguka kama mtende na matawi yake,

¹³yaani wazawa wote wa Aroni, wakiwa wamevaa mavazi yao yenye utukufu, wakiwa na tambiko za matoleo kwa Bwana mikononi, wamesimama mbele ya jumuiya yote ya Israeli.

¹⁴Alipomaliza huduma yake madhabahuni, na kuzipanga tambiko za Mungu Mkuu, Mwenye Nguvu,

¹⁵alinyosha mkono akachukua kikombe, akaimimina divai kwenye msingi wa madhabahu, ikiwa ni tambiko ya kinywaji, impendezayo Mungu Mkuu, mfalme wa wote.

¹⁶Kisha wazawa wa Aroni, walipiga kelele, na kupiga tarumbeta zao za fedha, wakitangaza kuweko kwake Mungu Mkuu.

¹⁷Ndipo watu wote pamoja walifanya haraka, wakasujudu na kumwabudu Bwana wao, Mungu Mwenye Nguvu, Mungu Mkuu.

¹⁸Nao waimbaji wakamsifu kwa sauti zao, kwa muziki mtamu na tuni kamili.

¹⁹Nao watu wakamsihi Bwana Mungu Mkuu, wakamwomba yeye mwenye huruma mpaka utaratibu wa kumwabudu Bwana ulipokwisha. Ndivyo walivyokamilisha ibada yake.

²⁰Kisha Simoni akatoka, akainua mikono yake juu ya jumuiya yote ya Israeli, ili kutamka baraka za Bwana kwa kinywa chake, na kulitukuza jina lake.

²¹Nao wakasujudu kwa mara ya pili, kupokea baraka za Mungu aliye juu ya yote.

²²Sasa msifuni Mungu wa wote, ambaye hufanya makuu kila mahali; ambaye hutunza maisha yetu tangu kuzaliwa, na kututendea kadiri ya huruma zake.

²³Na atupe furaha ya moyoni, na kutujalia amani siku zetu katika Israeli kama vile nyakati za kale.

²⁴Huruma yake na iwe kati yetu; yeye na atukomboe katika siku zetu.

²⁵Kuna mataifa mawili ambayo nayachukia, na la tatu halifai hata kuitwa taifa.

²⁶Wakazi wa mlima Seiri na Wafilisti, na wale watu wapumbavu wanaoishi Shekemu.

²⁷Nimeandika katika kitabu hiki mafundisho ya hekima na maarifa. Mimi ni Yoshua mwana wa Sira mwana wa Eleazari wa Yerusalemu ambaye moyoni mwangu nimebubujika hekima.

²⁸Heri mtu anayeyatafakari mambo hayo; naye ayawekaye moyoni atapata hekima.

²⁹Maana atakayeyatenda ataimarika daima, kwa kuwa kumcha Bwana ni uhai.