Read Swahilli Sira 6 Bible Online

Sira 6 - Swahilli bible

Sira 6

¹Maana sifa mbaya huleta aibu na makaripio, kama yampatayo mwenye dhambi mdanganyifu.

²Usikubali kutawaliwa na tamaa yako, la sivyo, itakuchana kama fahali,

³itayakwanyua matawi yako ukapoteza matunda yako, ukaachwa kama mti ulionyauka.

⁴Tamaa mbaya humwangamiza mwenyewe, na kumfanya awe kichekesho kwa maadui zake.

⁵Maneno ya upole humwongezea mtu marafiki kuongea kwa adabu husababisha hisani.

⁶Uwe na marafiki wengi wa kukusalimu, lakini wa kukushauri awe mmoja tu kati ya elfu.

⁷Ukitaka kupata rafiki mpime kwanza, usiharakishe kumwamini.

⁸Maana kuna rafiki aliye rafiki inapomfaa; siku ya taabu hatakuwako kukutegemeza.

⁹Pia kuna rafiki abadilikaye kuwa adui, atazusha ugomvi ili kukuaibisha.

¹⁰Pia yuko rafiki ambaye ni rafiki wakati wa mlo; lakini siku ya taabu hatakuwako kukutegemeza.

¹¹Ukipata fanaka atajifanya sawa nawe, na kuwaamuru watumishi wako.

¹²Lakini ukifilisika atakugeuka; na kujificha mbali nawe.

¹³Kaa mbali na maadui zako, na ujihadhari na rafiki zako.

¹⁴Rafiki mwaminifu ni kinga imara; ampataye rafiki kama huyo amepata hazina.

¹⁵Rafiki mwaminifu ana thamani kuliko chochote, hakuna awezaye kupima ubora wake.

¹⁶Rafiki mwaminifu ni dawa itiayo nguvu mwilini, watu wamchao Bwana ndio wanaompata rafiki huyo.

¹⁷Amchaye Bwana hupata marafiki wa kweli maana alivyo mtu ndivyo na rafiki zake.[2]

¹⁸Mwanangu, tangu ujana wako, chagua funzo, na hata uwapo mzee utaendelea kumpata Hekima.

¹⁹Fanya bidii kama mkulima na mpanzi kumtafuta Hekima, na kungojea mavuno yake bora. Itakubidi kushughulika juu yake kwa muda, lakini muda si muda utakula mazao yake.

²⁰Watu wasio na nidhamu humwona Hekima kuwa mkali, wapumbavu hawakai naye kwa muda mrefu.

²¹Kwao Hekima ni mzito kama jiwe la kupimia, nao hawakawii kumtupilia mbali.

²²Hekima kama jina lake lilivyo hajijulishi kwa watu wengi.[3]

²³Mwanangu, nisikilize na kufuata shauri langu. Usikatae mawaidha yangu.

²⁴Tia pingu za Hekima miguuni mwako, na ukosi wake shingoni mwako.

²⁵Beba mzigo wake, wala usichoke na vifungo vyake.

²⁶Mwendee kwa roho yako yote, na kushika njia zake kwa nguvu zako zote.

²⁷Mchunguze na kumtafuta, naye atajijulisha kwako. Ukisha mpata usimwachilie.

²⁸Mwishowe utapata pumziko kwake, naye atakuwa ndiye furaha yako.

²⁹Pingu zake zitakuwa ngome yako imara, na ukosi wake utakuwa ushanga wa thamani.

³⁰Nira yake ni pambo la dhahabu na vifungo vyake ni mkufu wa buluu.

³¹Hekima atakuwa kwako kama vazi la heshima, atakuwa kama taji la furaha kichwani pako.

³²Mwanangu, ukitaka, utafundishwa; pania kujifunza nawe utakuwa na akili.

³³Ukipenda kusikiliza, utapata maarifa; ukitega sikio lako, utakuwa mwenye hekima.

³⁴Ukienda kwenye mkutano wa wazee, akiwako mzee mwenye hekima ambatana naye.

³⁵Uwe tayari kusikiliza kila fundisho, na usiziache methali za hekima kukuponyoka.

³⁶Ukimwona mwenye hekima, mwendee mapema, kichakaze kizingiti cha nyumba yake kwa kumtembelea.

³⁷Zitafakari kanuni za Bwana, jishughulishe na amri zake. Yeye ataiimarisha akili yako, na hekima unayotamani utajaliwa.