Read Swahilli Sira 9 Bible Online

Sira 9 - Swahilli bible

Sira 9

¹Usimwonee wivu mke umpendaye; utakuwa umemfundisha namna ya kukudhuru.

²Usimwachie mwanamke ukuu wako, la sivyo atakutawala kabisa.

³Usifuatane na mwanamke wa tabia mbaya,[5] la sivyo utanaswa katika mitego yake.

⁴Usishirikiane na mwanamke mwanamuziki, la sivyo, utanaswa kwa werevu wake.

⁵Usimtazame kijana msichana mzuri; la sivyo, wewe na yeye mtapata adhabu ileile.

⁶Usimpe malaya moyo wako, la sivyo utapoteza nchi yako yote.

⁷Usipepesepepese macho mitaani mjini, wala kuzururazurura kwenye maeneo yake ya pekee.

⁸Usimtazame mwanamke mzuri, usimkodolee macho mwanamke mrembo asiye wako. Maana wengi wameangushwa kwa uzuri wa mwanamke, maana jambo hilo hufanya tamaa kuwaka kama moto.

⁹Kamwe usiketi na mke wa mtu, wala kuketi naye kunywa pombe; la sivyo moyo wako utampenda nawe utakosa kujizuia ukaangamia.

¹⁰Usimtupe rafiki wa miaka mingi, maana rafiki mpya hatalingana naye. Rafiki mpya ni kama divai mpya; divai ya miaka mingi hunywewa kwa furaha.

¹¹Usimwonee kijicho mwenye dhambi akifanikiwa, maana hujui mwisho wake utakuwaje.

¹²Usifurahie yanayowapendeza wasiomcha Mungu. Kumbuka hawataepa kuadhibiwa hapahapa duniani.

¹³Kaa mbali na mtu anayeweza kukuua, nawe hutakuwa na wasiwasi wa kuuawa. Kama ukimkaribia, uwe na tahadhari; la sivyo, utayaangamiza maisha yako. Ujue kuwa unatembea kwenye mtego hatari, na kwamba unatembea kwenye uwanja wa vita.

¹⁴Wafahamu jirani zako kadiri uwezavyo na kuwaomba ushauri watu wenye hekima.

¹⁵Mazungumzo yako yawe na wenye akili, na mazungumzo yako yote yahusu sheria ya Mungu Mkuu.

¹⁶Watu wanyofu wawe wenzako katika kula, majivuno yako yawe katika kumcha Bwana.

¹⁷Kazi ya mtu mwenye juhudi itapata sifa; kiongozi wa watu sharti awe hodari katika maneno yake.

¹⁸Mtu aropokaye ni kitisho mjini kwake; mtu wa maneno ya ovyo huchukiwa.