Read Swahilli 1 Wamakabayo 11 Bible Online

1 Wamakabayo 11 - Swahilli bible

1 Wamakabayo 11

¹Mfalme Tolemai wa Sita wa Misri alikusanya jeshi la askari wengi zaidi kuliko mchanga wa pwani, akaandaa na meli nyingi. Lengo lake lilikuwa kumnasa Aleksanda, kutwaa ufalme wake na kuuongeza kwenye milki yake mwenyewe.

²Hivi akaenda Siria, akiwaahidia watu amani. Raia wa huko wakamfungulia milango na kumkaribisha. Mfalme Aleksanda alikuwa amewaamuru wafanye hivyo kwa sababu Tolemai alikuwa mkwewe.

³Lakini Tolemai alipoelekea kaskazini, alipita na kuacha kikosi cha askari katika kila mji.

⁴Alipowasili Ashdodi, watu wakamwonesha magofu ya hekalu la Dagoni lililounguzwa moto, na uharibifu wote uliofanyika katika mji wa Ashdodi na viunga vyake. Maiti zilikuwa zimetapakaa kila mahali. Maiti za wale waliochomwa moto na Yonathani zilikuwa zimerundikwa kandokando ya barabara aliyopita Tolemai.

⁵Watu walimweleza maovu aliyokuwa ametenda Yonathani, wakitumaini kwamba atatiwa hatiani; lakini Tolemai hakusema lolote.

⁶Yonathani, kwa fahari, akaenda Yopa kuonana na Tolemai. Waliamkiana na kulala huko.

⁷Yonathani alimsindikiza Tolemai hadi mto Eleuthero, halafu akarejea Yerusalemu.

⁸Kwa njia hiyo mfalme Tolemai, katika hila zake dhidi ya Aleksanda, alijitwalia miji yote ya pwani hadi bandari ya Seleukia.

⁹Kutoka huko, Tolemai alimpelekea mfalme Demetrio ujumbe huu: “Hebu tufanye mapatano. Sasa hivi binti yangu ni mke wa Aleksanda. Lakini mimi nitamchukua tena huyo binti na kumwoza kwako na kukufanya utawale ufalme wa baba yako.

¹⁰Najilaumu kwa nini nilimpa Aleksanda binti yangu, kwa sababu ametafuta mbinu za kuniua.”

¹¹Tolemai alimlaumu hivyo Aleksanda kwa kuwa alitaka kumpokonya ufalme wake.

¹²Basi, akamnyang'anya binti yake na kumwoza Demetrio; akavunja uhusiano wote na Aleksanda, na uadui wao ukaonekana wazi.

¹³Tolemai akaingia Antiokia na kujichukulia utawala wa Asia; hivi alikuwa mtawala wa Misri na Asia.

¹⁴Wakati huo mfalme Aleksanda alikuwa Kilikia, kwa vile watu wa mkoa huo walikuwa wakifanya ghasia.

¹⁵Lakini aliposikia juu ya uvamizi wa Tolemai, aliondoka mara na kumshambulia Tolemai. Tolemai, akiwa na jeshi kubwa, alirudisha mashambulio na kumshinda kabisa Aleksanda.

¹⁶Aleksanda akakimbilia Arabia apate kujificha,

¹⁷lakini Mwarabu mmoja, Zabdieli, akamkata kichwa chake na kukipeleka kwa Tolemai.

¹⁸Siku mbili baadaye Tolemai naye akafa, na askari wake aliokuwa amewaacha katika ngome mbalimbali wakauawa na wenyeji wa miji hiyo.

¹⁹Hivi, mwaka 167,[22] Demetrio wa Pili akawa mfalme.

²⁰Siku hizohizo, Yonathani aliwakusanya watu wa Yudea ili kuishambulia ngome ya Yerusalemu. Waliunda mitambo mingi ya vita kwa ajili hiyo.

²¹Lakini Wayahudi fulani wasaliti, waliolichukia taifa lao wenyewe, wakaenda kwa mfalme Demetrio wa Pili na kumwambia kwamba Yonathani alikuwa anaizingira ngome ya Yerusalemu.

²²Demetrio aliposikia hayo alikasirika, akahamishia makao yake Tolemai. Halafu akamwandikia Yonathani na kumwamuru aache kuizingira ngome, na aende, bila kukawia, kuonana naye Tolemai.

²³Yonathani alipopata ujumbe huo, akawaamuru watu wake waendelee kuizingira ngome. Halafu akawachagua baadhi ya viongozi na makuhani wa Kiyahudi wamsindikize. Bila kujali maisha yake

²⁴alikwenda Tolemai kwa mfalme, akiwa amemchukulia mavazi, fedha na dhahabu, na zawadi nyingine nyingi. Mfalme alipendezwa sana naye.

²⁵Ingawa wahaini fulani wa taifa lake walikuwa wamemlaumu na kumshtaki Yonathani,

²⁶mfalme alimtendea Yonathani kama vile wafalme waliomtangulia walivyokuwa wamemtendea. Akampa heshima mbele ya washauri wake wote,

²⁷na akamthibitisha katika wadhifa wake wa kuhani mkuu. Alimrudishia madaraka yake yote ya awali, akampandisha juu kabisa katika orodha ya “Rafiki ya Mfalme”.

²⁸Ndipo Yonathani akamwomba mfalme afute kodi kwa nchi ya Yudea na ile mikoa mitatu ya Samaria,[23] akiahidi kumlipa kwa mkumbo mmoja fedha kiasi cha kilo 10,000, kama angefuta hiyo kodi.

²⁹Mfalme akakubali, na akaandika barua ifuatayo kwa Yonathani kuthibitisha hayo yote:

³⁰“Mfalme Demetrio, kwa nduguye Yonathani ndugu yake na taifa la Wayahudi: Salamu!

³¹“Hapa naambatisha, kwa taarifa yako, nakala ya barua niliyomwandikia ndugu Lasthene juu yako.

³²“ ‘Mfalme Demetrio kwa Mheshimiwa Ndugu Lasthene: Salamu!

³³Nimeamua kulipatia taifa la Wayahudi maslahi fulani kwa sababu ni rafiki zetu waaminifu na wanashika masharti ya mkataba wao.

³⁴Ninathibitisha kwamba taifa la Wayahudi lina haki juu ya nchi ya Yudea na ile mikoa mitatu ya Afairema, Luda na Rathamini, ambayo sasa inahamishiwa Yudea kutoka Samaria, pamoja na ardhi yote inayoihusu mikoa hiyo. Wote watakaotoa tambiko Yerusalemu hawatawajibika kulipa kodi kwa mfalme, ambayo hapo awali mfalme aliwadai kila mwaka, kutoka mavuno ya nafaka na matunda; kodi hiyo sasa itakuwa kwa manufaa ya hekalu.

³⁵Pia ninawaondolea malipo yote ninayowadai kutokana na zaka, ushuru, kodi ya machimbo ya chumvi, na kodi nyingine maalumu.

³⁶Vipengee vyote vya barua hii vitabaki hivyo bila kubatilishwa hata milele.

³⁷“ ‘Basi, angalia kwamba barua hii inanakiliwa kwa uaminifu, na nakala hiyo anapewa Yonathani, ili iwekwe mahali pa kufaa katika mlima wa hekalu, itakapoonekana wazi na watu wote.’”

³⁸Mfalme Demetrio alipoona kwamba nchi imetulia chini ya utawala wake, na hakuna tena upinzani, akalivunja jeshi lake na kuwarudisha nyumbani askari wote - isipokuwa wale aliokuwa amewakodi kutoka visiwa vya Ugiriki. Kitendo hicho kiliwaudhi askari wote waliokuwa wameajiriwa na wafalme waliomtangulia Demetrio, kwa vile sasa walikuwa hawana mshahara; wakamchukia mfalme.

³⁹Trifo, ambaye kwanza alikuwa upande wa Aleksanda, alipoona askari wote wananung'unika juu ya Demetrio, akamwendea Imalkue, Mwarabu aliyekuwa anamlea na kumtunza Antioko, mwana wa Aleksanda.

⁴⁰Trifo akakaa huko kwa muda mrefu, akimbembeleza Imalkue amwachie yeye huyo mtoto mdogo wa Aleksanda, ili amfanye mfalme badala ya baba yake. Pia alimsimulia Imalkue kuhusu matendo ya Demetrio, na jinsi askari walivyomchukia.

⁴¹Wakati huo huo, Yonathani akampelekea ujumbe mfalme Demetrio, akimwomba aondoe askari wake katika ngome ya Yerusalemu na maboma mengine ya Yudea, kwa vile walikuwa wanawanyanyasa Wayahudi.

⁴²Demetrio akajibu: “Nitatekeleza ombi lako, na wasaa utakaporuhusu, nitakutunukia wewe na taifa lako heshima za hali ya juu kabisa.

⁴³Lakini sasa uniletee msaada wa askari watakaonipigania, maana askari wangu wote wameniasi.”

⁴⁴Basi, Yonathani akawapeleka Antiokia askari hodari 3,000. Mfalme alifurahi sana walipowasili,

⁴⁵kwa sababu genge la watu 120,000 lilikuwa limekusanyika mjini, limepania kumwua mfalme.

⁴⁶Lakini mfalme akatorokea ikulu, wakati watu wanaishika mitaa ya mji na kuanza ghasia.

⁴⁷Hapo mfalme akaita askari wa Kiyahudi wamsaidie, nao wote wakaitika mara, wakaenda huko na huko mjini na kuwaua watu wapatao laki moja.

⁴⁸Waliokoa maisha ya mfalme, lakini mji waliupora na kuuchoma moto.

⁴⁹Watu walipoona kwamba Wayahudi wameukamata mji wao kabisa, walivunjika moyo, wakamsihi mfalme, wakiomba:

⁵⁰“Tupe amani, na ukomeshe hayo mashambulio ya Wayahudi dhidi yetu na mji wetu.”

⁵¹Hao waasi wakaweka silaha chini na kupandisha mikono juu. Mfalme na raia wake wote wakawa na heshima kubwa kwa Wayahudi. Nao Wayahudi wakarejea Yerusalemu na shehena ya mateka.

⁵²Lakini mfalme Demetrio alipoimarika tena katika utawala wake, na nchi yote kuwa na amani,

⁵³akakiuka ahadi zake zote na kuvunja uhusiano na Yonathani; badala ya kumlipa mema kama ilivyotazamiwa, yeye alimkandamiza vibaya sana.

⁵⁴Kitambo baadaye, Trifo alirejea pamoja na yule mvulana Antioko, akamtia taji na kumtawaza kuwa mfalme.

⁵⁵Wale askari wote walioachishwa kazi na Demetrio wakamwunga mkono mfalme mpya. Wakampiga na kumshinda Demetrio, naye akakimbia.

⁵⁶Trifo akawateka tembo wa vita na kuushika mji wa Antiokia.

⁵⁷Mfalme chipukizi, Antioko, akamwandikia Yonathani na kumthibitisha katika cheo chake cha kuhani mkuu, na cha mkuu wa mikoa ile minne, akamteua awe “Rafiki wa Mfalme”.

⁵⁸Akampelekea vyombo vya dhahabu na vya kutumia mezani, akampa idhini ya kunywea vikombe vya dhahabu, kuvaa mavazi ya kifalme, na kuvaa bizimu ya dhahabu.

⁵⁹Pia alimteua ndugu ya Yonathani, Simoni, kuwa mkuu wa eneo lote kutoka mlima Ngazi ya Tirza hadi mipaka ya Misri.

⁶⁰Kisha, Yonathani akapita na jeshi lake katika miji ya Siria Kuu; majeshi yote ya Siria yakajumuika naye katika ushirika. Alipofika Askaloni, wenyeji wa mji huo walimlaki na kumpatia heshima.

⁶¹Halafu akaenda Gaza, lakini wakazi wake wakafunga milango ya mji na kumzuia. Basi, Yonathani akauzingira mji huo, akauchoma moto na kuviteka viunga vyake.

⁶²Ndipo watu wa Gaza wakamtaka amani, naye akafanya mpango wa amani. Akawachukua wana wa viongozi na kuwapeleka Yerusalemu wawe mateka. Baada ya hayo, akaenda zake Damasko.

⁶³Yonathani akasikia kwamba maofisa wa Demetrio walikuwa wamefika Kadeshi, Galilaya, na jeshi kubwa, wakinuia kumwondoa Yonathani madarakani.

⁶⁴Basi, akamwacha nduguye Simoni, nchini Yudea, akaondoka kwenda kupambana na jeshi la Demetrio.

⁶⁵Simoni akauzingira mji wa Beth-zuri na kuupiga vita kwa muda mrefu.

⁶⁶Kisha wenyeji wake wakaomba masharti ya amani, naye Simoni akakubali. Basi, akauteka mji huo, akawafukuzia nje wakazi wake, akaweka humo kikosi cha askari.

⁶⁷Yonathani na jeshi lake wakapiga kambi kando ya Ziwa Genesareti. Mapema asubuhi iliyofuata aliwaongoza wanajeshi wake kwenye tambarare ya Hazori,

⁶⁸ambako sehemu kubwa ya jeshi la kigeni ilikuwa inasonga mbele kumkabili. Kumbe maadui walikuwa wameacha kikosi cha askari kikivizia milimani, lakini wakakutana naye ana kwa ana.

⁶⁹Hao askari waliojificha wakatokeza na kuanza kushambulia.

⁷⁰Jeshi lote la Yonathani likageuka na kukimbia. Hapana aliyebaki, isipokuwa maofisa wawili: Matathia mwana wa Absalomu, na Yuda mwana wa Kalfi, makamanda wa jeshi.

⁷¹Yonathani alirarua mavazi yake kwa uchungu, akajitia mavumbi kichwani, akasali.

⁷²Kisha akarudi kwenye mapambano, akawapiga maadui, na kuwafanya wakimbie.

⁷³Askari wake waliokuwa wanakimbia walipoona hayo, walirudi na kujiunga naye katika kuwafuatia maadui. Waliwafukuza adui moja kwa moja hadi kambini kwao Kadeshi, halafu wakaiteka hiyo kambi.

⁷⁴Askari wa adui wasiopungua 3,000 waliuawa siku hiyo. Yonathani akarejea Yerusalemu.