Read Swahilli 1 Wamakabayo 2 Bible Online

1 Wamakabayo 2 - Swahilli bible

1 Wamakabayo 2

¹Wakati huo, Matathia mwana wa Yohane na mjukuu wa Simeoni, kuhani wa ukoo wa Yoaribu, alitoka Yerusalemu akaenda kukaa Modeini.

²Alikuwa na watoto watano wa kiume: Yohane aliyeitwa pia Gadi,

³Simoni aliyeitwa Thasi,

⁴Yuda aliyeitwa Makabayo,

⁵Eleazari aliyeitwa Avarani, na Yonathani aliyeitwa Afusi.

⁶Matathia alipoona kufuru zote zilizotendwa huko Yudea na Yerusalemu,

⁷akasema: “Maskini mie! Kwa nini nilizaliwa nione maovu haya, kuharibiwa kwa watu wangu, kuangamizwa kwa mji mtakatifu? Nikae mie hapa naangalia tu, ambapo mji mtakatifu unatiwa mikononi mwa adui, na hekalu linaachiwa watu wageni?

⁸Hekalu limekuwa kama mtu asiye na heshima.

⁹Vyombo vyake vya fahari vimetekwa na kuchukuliwa. Watoto wake wadogo wameuawa barabarani, vijana wake wamechinjwa kwa upanga wa adui.

¹⁰Kila taifa ulimwenguni limeukalia mji wetu, na kuzipora mali zake!

¹¹Mapambo yake yote yameondolewa na kuchukuliwa; sasa ni mtumwa, si mji huru tena.

¹²Litazameni hekalu letu; halina uzuri wala utukufu wowote, watu wa mataifa wamelikufuru.

¹³Kwa nini tuendelee kuishi?”

¹⁴Ndipo Matathia na wanawe wakararua mavazi yao, wakavaa magunia na kulia kwa majonzi na uchungu mkali.

¹⁵Halafu maofisa wa mfalme, wale waliokuwa wanawalazimisha watu kumwasi Mungu, wakafika mjini Modeini kuwashurutisha wakazi wake kutambika.

¹⁶Waisraeli wengi wakawajia hao maofisa, wakiwamo miongoni mwao Matathia na wanawe.

¹⁷Maofisa wa mfalme wakamwambia Matathia, “Wewe ni kiongozi unayeheshimiwa katika mji huu, na unaungwa mkono na wanao na jamaa zako.

¹⁸Kwa nini usiwe wa kwanza sasa kutekeleza amri ya mfalme? Watu wote wa mataifa mengine, wananchi wote wa Yudea, na watu wote waliobaki Yerusalemu wamekwisha tekeleza hilo. Kama utatimiza amri ya mfalme, wewe na wanao mtapewa heshima kubwa na kuitwa ‘Marafiki wa Mfalme,’ na mtatunukiwa fedha na dhahabu na zawadi nyingine nyingi.”

¹⁹Matathia akajibu kwa sauti kubwa, “Hata kama mataifa yote yaliyo chini ya utawala wa mfalme yametii na kushika amri yake, na hivi kuachana na dini zao za jadi,

²⁰mimi na wanangu na ndugu zangu tutaendelea kushika agano ambalo Mungu alifanya na wazee wetu.

²¹Kwa msaada wa Mungu, kamwe hatutaitupa sheria yake, wala kuzivunja amri zake Mungu.

²²Amri ya mfalme hatutaishika kamwe, na hatutabadili chochote katika ibada zetu!”

²³Wakati Matathia anamalizia kusema haya, Myahudi mmoja wa Modeini alijitokeza mbele ya wote, akataka kutoa tambiko juu ya madhabahu iliyokuwa hapo, kufuatana na amri ya mfalme.

²⁴Matathia alipomwona, akawaka ghadhabu na moyo kulipuka. Huku anatetemeka kwa hasira, akamwendea mbio na kumuua papo hapo juu ya madhabahu.

²⁵Pia akamuua ofisa wa mfalme aliyekuwa anawalazimisha watu kutoa tambiko, akaibomolea mbali madhabahu hiyo.

²⁶Kwa namna hiyo Matathia alionesha ari yake kwa sheria, kama vile Finehasi alivyokuwa ameonesha alipomuua Zimri, mwana wa Salu.

²⁷Halafu Matathia akapita mjini akisema kwa sauti kubwa: “Kila aliye na ari kwa ajili ya sheria ya Mungu, na anayeliunga mkono agano lake, na anifuate!”

²⁸Matathia mwenyewe na wanawe wakakimbilia milimani na kuviacha vyote walivyokuwa navyo mjini.

²⁹Wakati huo Waisraeli wengi waliotaka kushikilia dini yao na sheria wakateremka na kufanya maskani yao nyikani,

³⁰wao pamoja na wana wao, wake zao, na mifugo yao, maana mateso yao yalikuwa yamewasonga.

³¹Basi, taarifa ikawafikia maofisa wa mfalme na wanajeshi waliokuwa Yerusalemu, mji wa Daudi, kwamba watu waliokataa kutii amri ya mfalme walikuwa wamekimbilia chini mafichoni nyikani.

³²Wanajeshi wengi wakawaandama, wakawakuta na kujitayarisha kuwashambulia siku ya Sabato.

³³Basi wakawaambia, “Yatosha sasa! Tokeni nje na kutekeleza amri ya mfalme, nanyi mtaishi.”

³⁴Lakini wao wakasema, “Kamwe hatutatoka nje! Wala amri ya mfalme hatutaishika na kuitia unajisi siku ya Sabato.”

³⁵Basi, mara moja maadui hao wakaanza kuwashambulia Wayahudi.

³⁶Lakini wao hawakurudisha mashambulio, wala kuwatupia jiwe, wala kuwazuia wasiingie katika maficho yao,

³⁷maana walisema, “Na tufe sote tukiwa wenye dhamiri safi. Mbingu na dunia zitushuhudie kwamba mnatuua bila haki.”

³⁸Hivi wakawashambulia siku ya Sabato na kuwaua watu 1,000, wanaume, wanawake na watoto. Mifugo pia wakaiteketeza.

³⁹Matathia na rafiki zake walipopata habari hiyo, waliwalilia sana wenzao.

⁴⁰Na kila mmoja wao akamwambia mwenzake: “Kama sote tutafanya walivyofanya hawa ndugu zetu na kukataa kupambana na maadui ili kutetea maisha yetu na dini yetu, punde si punde watatufutilia mbali kutoka duniani.”

⁴¹Basi, siku hiyo wakaamua kwamba kama yeyote yule atawashambulia siku ya Sabato, watajitetea, wasije wakauawa wote kama Wayahudi wenzao walivyouawa mafichoni mwao.

⁴²Ndipo walipojiunga nao watu wa kikundi cha Wahasidi ambao walikuwa mashujaa wa vita katika Israeli na walio tayari kabisa kuitetea sheria.

⁴³Tena kila mmoja aliyeamua kukimbia na kujiepusha na dhuluma hiyo alijiunga nao na kuzidi kuwaimarisha.

⁴⁴Basi, walikusanya jeshi, na kwa hasira yote wakawashambulia Wayahudi ambao hawakujali sheria. Wale walioponea chupuchupu wakakimbilia usalama kwa watu wa mataifa mengine.

⁴⁵Matathia na rafiki zake wakapita huko na huko wakibomoa madhabahu za miungu,

⁴⁶na kuwatahiri kwa nguvu wavulana wote waliowakuta hawajatahiriwa nchini Israeli.

⁴⁷Pia walifanikiwa kuwatia nguvuni maofisa mafidhuli wa mfalme.

⁴⁸Hivi wakaiokoa sheria ya Mose makuchani mwa watu wa mataifa mengine na wafalme wake, na hawakumwacha mwenye dhambi ashinde.

⁴⁹Matathia alipoona kwamba siku yake ya kufa imekaribia, aliwaambia wanawe: “Sasa kiburi na dharau vimepamba moto. Sasa ni wakati wa maangamizi na ghadhabu kali!

⁵⁰Hata hivyo, nyinyi, wanangu, lazima mjitoe mhanga kwa ajili ya sheria, na kutoa maisha yenu kwa ajili ya agano la wazee wetu.

⁵¹“Kumbukeni waliyofanya wazee wetu nyakati zao, nanyi mtatunukiwa taji ya utukufu na sifa milele.

⁵²Kumbukeni jinsi Abrahamu alivyokuwa mwaminifu pale alipojaribiwa, akakubaliwa kuwa mwadilifu.

⁵³Yosefu, alipokuwa katika matatizo, alitii amri za Mungu, akawa mtawala wa nchi ya Misri.

⁵⁴Mzee wetu Finehasi, kwa sababu ya uchaji na ari yake kuu, aliahidiwa kwamba wazawa wake daima watakuwa makuhani.

⁵⁵Yoshua alifanywa mwamuzi katika Israeli kwa sababu alitii amri.

⁵⁶Kalebu alileta taarifa nzuri kwa jumuiya, akapewa zawadi sehemu ya ardhi.

⁵⁷Daudi kwa kuwa alikuwa na huruma alirithi kiti cha enzi cha ufalme milele.

⁵⁸Elia, kwa sababu ya ari yake kuu kwa ajili ya sheria, alichukuliwa juu mbinguni.

⁵⁹Hanania, Azaria na Mishaeli waliokolewa katika moto kwa sababu walikuwa na imani.

⁶⁰Danieli alikuwa mtu mwadilifu, naye Bwana akamwokoa kinywani mwa simba.

⁶¹Kila mmoja wa hao wazee wetu ni kielelezo wazi kwamba kila anayemtumainia Mungu hakosi msaada.

⁶²“Msiogope vitisho vya mtu mwovu. Kumbukeni ya kwamba huyo naye atakufa, na fahari yake yote itakoma, na mwili wake utaoza na kuliwa na wadudu.

⁶³Leo anaweza akatukuzwa na kusifiwa, lakini kesho atatoweka; mwili wake utarudi mavumbini, na mipango yake itaishia hewani.

⁶⁴Lakini nyinyi, wanangu, pigeni moyo konde, simameni imara katika kushika sheria, maana kwa sheria mtajipatia utukufu na sifa.

⁶⁵“Kaka yenu Simoni ana busara na hekima. Hivi, msikilizeni yeye daima kama vile mngenisikiliza mimi baba yenu.

⁶⁶Yuda Makabayo amekuwa shujaa wa vita tangu ujana wake; atakuwa kamanda wenu wa jeshi, na kuongoza mapambano dhidi ya maadui.

⁶⁷Yeyote anayeshika sheria, mwalikeni ajiunge nanyi; halafu lipeni kisasi kwa maovu waliyotendewa watu wenu.

⁶⁸Walipeni watu wa mataifa mengine kadiri ya walivyowatendeni; daima shikeni maagizo ya sheria.”

⁶⁹Kisha, Matathia akawabariki, akaaga dunia.

⁷⁰Alizikwa katika kaburi la babu zake kule Modeini, na watu wote wa Israeli wakalia na kuomboleza kwa kifo chake. Hayo yalitukia katika mwaka wa 146.[4]