Read Swahilli 2 Wamakabayo 11 Bible Online

2 Wamakabayo 11 - Swahilli bible

2 Wamakabayo 11

¹Mara baada ya hayo, si muda mrefu baada ya Timotheo kushindwa, Lisia, mlinzi na ndugu ya mfalme na mkuu wa serikali, alipata habari hizo. Alikasirika sana,

²akaongoza askari wa miguu 80,000 na wapandafarasi wake wote dhidi ya Wayahudi. Alikuwa na shabaha ya kuufanya mji wa Yerusalemu makao ya Wagiriki,

³na kulitoza kodi hekalu, kama mahali pengine pote pa ibada ya watu wa mataifa mengine. Na ukuhani mkuu ungenadiwa kila mwaka.

⁴Lisia hakujali chochote juu ya uwezo wa Mungu, bali alijivunia makumi elfu ya askari wake wa miguu, maelfu ya wapandafarasi wake, na tembo wake themanini.

⁵Hivi akaivamia Yudea na kuishambulia ngome ya Beth-zuri, yapata kilomita thelathini kusini ya Yerusalemu.

⁶Yuda Makabayo na watu wake waliposikia kwamba Lisia alikuwa anazizingira ngome zao, wakalia na kuomboleza pamoja na watu wote, wakimsihi Bwana amtume malaika mwema awaokoe.

⁷Yuda Makabayo alikuwa wa kwanza kuchukua silaha, akawahimiza wengine wajiunge naye katika kutoa mhanga maisha yao ili kuwasaidia Wayahudi wenzao. Hivi, wakatoka pamoja naye kwa ari na motomoto kabisa.

⁸Lakini, kabla hawajaenda mbali na Yerusalemu, kwa ghafla wakagundua kwamba walikuwa wanaongozwa na mpandafarasi mwenye mavazi meupe, amechukua silaha za dhahabu.

⁹Mara, wote kwa pamoja, wakamshukuru Mungu kwa huruma yake; alikuwa amewatia ujasiri wa kutosha kwa kushambulia si binadamu tu, bali pia wanyama wakali na hata kuta za chuma.

¹⁰Basi, wakaenda mbele wamejipanga kivita, wakiwa pamoja na yule msaidizi kutoka mbinguni, maana Bwana alikuwa amewaonea huruma.

¹¹Kama simba, waliwarukia maadui zao na kuwaangusha askari wa miguu 11,000, na wapandafarasi 1,600, na kuwafanya wengine wakimbie.

¹²Wengi wa hao waliokimbia walikuwa wamejeruhiwa na kupoteza silaha zao. Hata Lisia mwenyewe alikimbia kwa aibu.

¹³Lisia, kwa vile hakuwa mjinga, alitafakari juu ya kushindwa kwake vitani, akatambua kwamba Wayahudi walikuwa hawashindiki kwa sababu Mungu Mwenye Nguvu alikuwa amewapigania. Kwa hiyo akapeleka ujumbe,

¹⁴akawashawishi wakubali kupatana kwa masharti ya haki, na akaahidi kumshawishi mfalme awe rafiki wao.

¹⁵Kwa manufaa ya watu wake, Yuda Makabayo akayakubali mapendekezo yote ya Lisia, kwa vile mfalme alikuwa ameyapokea na kuyakubalia maombi yote ambayo Yuda alikuwa amempa Lisia kwa maandishi.

¹⁶Ifuatayo ni barua ambayo Lisia aliwaandikia Wayahudi: “Mimi Lisia kwa taifa la Wayahudi, salamu.

¹⁷Wajumbe wenu, Yohane na Absalomu, wamenikabidhi hati maalumu ambayo mliwatuma waniletee, na wameniomba nikubaliane na yaliyoandikwa katika hati hiyo.

¹⁸Nimemwarifu mfalme kuhusu masuala yote ambayo mlitaka kuweka mbele yake, naye amekubali kufanya lolote linalowezekana.

¹⁹Kama mtaendelea kuwa waaminifu kwa serikali, nitafanya kila niwezalo siku za mbele, kwa manufaa ya taifa lenu.

²⁰Nimewaagiza wajumbe wenu na wawakilishi wangu kukutana nanyi na kujadiliana mambo hayo katika vipengele vyake vyote.

²¹Nawatakieni kila la fanaka. Imeandikwa siku ya ishirini na nne ya mwezi Dioskorinthio, mwaka 148.”[9]

²²Na barua ya mfalme ilikuwa kama ifuatavyo: “Mimi mfalme Antioko kwa ndugu yangu Lisia, salamu.

²³Kwa kuwa baba yangu amekwenda kujiunga na miungu, nataka raia wa ufalme wangu kuendesha mambo yao wenyewe bila kuingiliwa.

²⁴Naelewa kwamba Wayahudi hawataki kuishi kadiri ya utamaduni wa Kigiriki - kama baba yangu alivyokuwa amenuia - ila wanapendelea kuishi kadiri ya utamaduni wao, na wameomba waruhusiwe kuishi hivyo.

²⁵Kwa vile natamani waishi bila wasiwasi kama mataifa mengine katika milki yangu, sasa natoa amri kwamba warudishiwe hekalu lao, na kuruhusiwa kuishi kadiri ya mila za wazee wao.

²⁶Basi, itakuwa vema kuwajulisha juu ya uamuzi huu, na kuwahakikishia kwamba nitakuwa rafiki kwao, ili waweze kuendesha mambo yao wenyewe kwa amani, bila wasiwasi wowote.”

²⁷Ifuatayo ni barua ya mfalme kwa taifa la Wayahudi: “Mimi mfalme Antioko kwa Baraza Kuu la Wayahudi na Wayahudi wengine wote, salamu.

²⁸Natumaini mambo yenu yote yanawaendea vizuri kama ninavyotamani. Mimi ni mzima wa afya.

²⁹Menelao ameniarifu kwamba mnataka kurudi nyumbani na kushughulika na mambo yenu wenyewe.

³⁰Kwa hiyo, basi, baadhi yenu watakaorudi nyumbani ifikapo tarehe kumi na tatu ya mwezi Ksanthiko, ninawaapia, wasiogope chochote.

³¹Mnaweza kuendelea kushika sheria zenu kuhusu vyakula, na nyinginezo, kama mlivyokuwa mmezoea. Na hapana Myahudi atakayenyanyaswa kwa mambo yaliyofanyika bila kujua.

³²Ninamtuma Menelao kuwatieni moyo.

³³Tunawatakieni fanaka. Imeandikwa siku ya kumi na tano ya mwezi Ksanthiko, mwaka 148.”[10]

³⁴Waroma nao waliwaandikia Wayahudi barua ifuatayo: “Kwinto Memio na Tito Manio, wawakilishi wa Waroma, kwa Wayahudi, salamu.

³⁵Sisi tunakubaliana kabisa masharti yote mliyopewa na Lisia, nduguye mfalme.

³⁶Sasa tumo njiani kwenda Antiokia; kwa hiyo, yachunguzeni kwa makini masuala yale ambayo Lisia alimwuliza mfalme. Halafu tuleteeni majibu haraka kusudi tuweze kuwawakilisheni kwa mfalme, kwa manufaa yenu. Fanyeni hilo mapema iwezekanavyo,

³⁷bila kukawia, ili tuweze kujua mmeamua nini.

³⁸Tunawatakieni fanaka. Imeandikwa siku ya kumi na tano ya mwezi Ksanthiko, mwaka 148.”[11]