Read Библија, Константинов Битие (1 Moj.) 11 Bible Online

Битие (1 Moj.) 11 - Библија, Константинов bible

Битие (1 Moj.) 11

¹Целата земја имаше еден јазик и исти зборови.

²Ама кога луѓето се преселија од исток, најдоа рамница во Сенарската Земја, и се населија таму.

³И си рекоа еден на друг: „Ајде, да направиме плитари и да ги испечеме во оган!” Плитарите им беа место камен, а смолата место кал.

⁴Тогаш рекоа: „Ајде, да си изградиме град и кула, со врв до небото! Да си спечалиме име, за да не се распрснеме по целата земја!”

⁵Господ слезе да ги види градот и кулата, што луѓето ги градеа.

⁶И Господ рече: „Ете, еден народ се, со еден јазик за сите! Но, ова е само почеток на нивните настојувања. Сега ништо нема да им биде неостварливо, што и да намислат да направат.

⁷Да слеземе и да им го измешаме јазикот, за да не се разбираат еден со друг што зборуваат.”

⁸Така Господ ги распрсна оттаму по целата земја и прекратија да го ѕидаат градот.

⁹Затоа е наречен Вавилон (Мешање), зашто Господ го измеша таму јазикот на целата земја.

¹⁰Овие се Симови потомци: кога Сим имаше сто години - на две години по потопот - му се роди Арфаксад.

¹¹По Арфаксадовото раѓање, Сим живееше пет стотини години и му се раѓаа уште синови и ќерки.

¹²Кога Арфаксад наполни триесет и пет години, му се роди Сала;

¹³а по Салиното раѓање Арфаксад живееше четири стотини и три години, и му се раѓаа уште синови и ќерки.

¹⁴Кога Сала имаше триесет години, му се роди Евер;

¹⁵а по Еверовото раѓање Сала живееше четири стотини и три години, и му се раѓаа уште синови и ќерки.

¹⁶Кога Евер имаше триесет и четири години, му се роди Фалек.

¹⁷По Фалековото раѓање, Евер поживеа четири стотини и триесет години, и му се родија уште синови и ќерки.

¹⁸Кога Фалек наполни триесет години, му се роди Рагав.

¹⁹По Рагавовото раѓање, Фалек живееше двеста и девет години, и му се родија уште синови и ќерки.

²⁰Кога на Рагав му беа триесет и две години, му се роди Серух.

²¹По Серуховото раѓање, Рагав поживеа двеста и седум години, и му се народија уште синови и ќерки.

²²Кога Серух имаше триесет години, му се роди Нахор.

²³По Нахоровото раѓање, Серух живееше двеста години и му се родија уште синови и ќерки.

²⁴Кога Нахор имаше дваесет и девет години, му се роди Тара.

²⁵По Тариното раѓање, Нахор живееше сто и деветнаесет години, и му се природија уште синови и ќерки.

²⁶Кога на Тара му беа седумдесет години, му се родија Аврам, Нахор и Аран.

²⁷Ова е Тарино потомство: На Тара му се родија: Аврам, Нахор и Аран; а на Аран му се роди Лот.

²⁸Аран почина пред татка си, во својата родна земја, во Халдејски Ур.

²⁹Аврам и Нахор се оженија. Името на Аврамовата жена беше Сара, а на Нахоровата - Мелха, ќерка на Арам, татко на Мелха и Есха.

³⁰Сара беше неротка, немаше пород.

³¹Тара ги поведе: својот син Аврам, својот внук Лот, Арановиот син, и својата снаа Сара, сопругата на сина си Аврама, и се запати, со нив, од Халдејскиот Ур кон Ханаанската Земја. Кога стигнаа до Харан, се населија таму.

³²А Тариниот век стигна до двеста и пет години; а тогаш Тара почина во Харан.