Read Библија, Константинов Битие (1 Moj.) 26 Bible Online

Битие (1 Moj.) 26 - Библија, Константинов bible

Битие (1 Moj.) 26

¹Во земјата настапи глад, различен од поранешниот, што беше за времето на Авраама, па Исак отиде при Авимелеха, царот на Филистејците во Герар.

²Господ му се јави и рече: „Не слегувај во Египет: живеј во земјата, што ќе ти ја покажам.

³Настани се во таа земја, Јас ќе бидам со тебе и ќе те благословувам; тебе и на твоето потомство ќе ви ги дадам сите овие земји, за да ја исполнам заклетвата со која му се заколнав на татка ти Авраама.

⁴Ќе го умножам твоето потомство како ѕвезди на небесата и на твоето потомство ќе му ги дадам сите овие краеви, така што преку твоето потомство ќе бидат благословувани сите народи на земјата;

⁵бидејќи Авраам го слушаше Мојот глас и им се покоруваше на Моите заповеди, на Моите закони и одредби!”

⁶Така Исак остана во Герар.

⁷Кога месните жители го прашаа за неговата жена, рече: „Таа ми е сестра.” Се плашеше да рече: „Таа ми е жена,” мислејќи: „Месните жители можат да ме убијат заради Ревека, зашто е убава.”

⁸Бидејќи таму се задржаа подолго, царот на Филистејците Авимелех еднаш погледна низ прозорецот и виде дека Исак ја милува својата жена Ревека.

⁹И Авимелех го повика Исака и рече: „Така, таа ти е жена! Како можеше да речеш дека ти е сестра?” Исак му одговори: „Зашто мислев дека можам да загинам заради неа.”

¹⁰Авимелех рече: „Зошто ми направи така? За малку еден од мојот народ не легна со твојата жена, и ти би нè вовел нас во грев.”

¹¹Тогаш Авимелех му објави повелба на својот народ: „Кој ќе се допре до овој човек и до неговата жена, ќе ја изгуби главата.”

¹²Исак посеа во онаа земја, и во тоа лето му роди стопати повеќе. Господ го благословуваше,

¹³и човекот стануваше сè побогат.

¹⁴Спечали стада со овци и говеда, доби и многу слуги, така што Филистејците му завидеа.

¹⁵Затоа Филистејците ги затрупаа сите кладенци, што ги беа ископале слугите на татка му - во времето на неговиот татко Авраам - и ги наполнија со земја.

¹⁶Тогаш Авимелех му рече на Исака: „Оди си од нас, зашто стана многу посилен од нас!”

¹⁷Така Исак си отиде оттаму. Го оптегна својот шатор во Герарската Долина и се настани таму.

¹⁸Исак пак ги ископа кладенците за вода, што беа ископани во времето на татка му Авраама, а што Филистејците ги беа наполниле со земја по Авраамовата смрт. Тој ги нарече со истите имиња, со кои ги нарече и неговиот татко.

¹⁹Но кога Исаковите слуги, додека копаа во долината, таму најдоа кладенец со жива вода,

²⁰пастирите од Герар спореа со Исаковите пастири, велејќи: „Водата е наша!” На кладенецот му го даде името Есек, зашто спореа со нив.

²¹А кога ископаа друг кладенец, па спореа и заради него, го нарекоа со името Ситна.

²²Тој се пресели оттаму и ископа друг кладенец. Не спореа заради него, па го нарекоа со името Ровот и протолкуваа: „Зашто Господ ни даде пространство за да се намножиме на земјата.”

²³Оттаму се искачи во Вирсавеа.

²⁴Господ му се јави во истата ноќ и рече: „Јас Сум Бог на татка ти Авраама: Не бој се, Јас Сум со тебе! Ќе те благословам, ќе ти ги умножам потомците, заради својот слуга Авраама.”

²⁵Исак издигна жртвеник таму и Го повика Господа по име; постави таму свој шатор, а неговите слуги почнаа да копаат кладенец.

²⁶Тогаш при него дојде Авимелех од Герар, со својот советник Охозат и со Фихол, началник на војската.

²⁷Исак ги праша: „Зошто дојдовте при мене кога ме мразите и кога ме истеравте од себе?”

²⁸Тие одговорија: „Гледаме јасно дека Господ е со тебе: заклетвата нека биде врска меѓу нас и тебе. Дај да склучиме сојуз со тебе:

²⁹ти нема да ни нанесуваш зло, како што ние не те злоставувавме тебе, туку секогаш постапувавме добро со тебе и те отпуштивме со мир. А сега Господовиот благослов е на тебе.”

³⁰Тој им даде гозба, па јадеа и пиеја.

³¹Рано наутро се заколнаа едни на други. Потоа Исак ги испрати, и тие си отидоа од кај него, со мир.

³²Во истиот ден Исаковите слуги дојдоа и го известија за кладенецот, што го ископаа и му рекоа: „Најдовме вода.”

³³Тој го нарече Савеа. Затоа името на градот до денес е Вирсавеа.

³⁴Кога Исав беше на четириесет години, ги зеде за жени: Јудита, ќерка на Хетеецот Веири, и Васемата, ќерка на Хетеецот Елон.

³⁵Тие станаа извор на огорчение за Исак и Ревека.