Read Библија, Константинов Битие (1 Moj.) 29 Bible Online

Битие (1 Moj.) 29 - Библија, Константинов bible

Битие (1 Moj.) 29

¹Јаков го продолжи патувањето и дојде во Источната Земја.

²Одеднаш забележа кладенец во полето. Три стада овци се одмараа околу него, зашто се напојуваа од кладенецот. Голем камен се наоѓаше врз кладенецот.

³Единствено кога ќе се собереа сите сточари таму, можеа да го поместат каменот од отворот и да ги напојат овците, потоа пак го ставаа каменот на неговото место, врз отворот на кладенецот.

⁴„Од каде сте, браќа мои?” ги праша Јаков. „Од Харан”, одговорија.

⁵„Дали го познавате - ги праша натаму - Нахоровиот син Лаван?” „Го познаваме”, одговорија.

⁶„Дали е здрав?”, пак ги праша. „Здрав е; и ете, доаѓа неговата ќерка Рахила со стадото”, одговорија.

⁷„Уште е многу рано - продолжи тој - не е време за прибирање на добитокот. Зошто не го напојувате и не го отерате на пасење?”

⁸„Не можеме додека не се соберат сите овчари - одговорија - да го отстранат каменот од отворот на кладенецот, така да можеме да ги напоиме овците.”

⁹Додека тој уште зборуваше со нив, дојде Рахила со овците на татка си. Имено, беше овчарка.

¹⁰Кога Јаков ја здогледа Рахила, ќерката на Лавана, брат и на мајка му, со стадото на вујка му Лавана, Јаков се доближи и го измести каменот од отворот на кладенецот и го напои стадото на вујкото Лаван.

¹¹Потоа ја пољуби Рахила, а тогаш заплака.

¹²И Јаков и кажа на Рахила дека тој е внук од сестра на татка и, син Ревекин. Таа се растрча и му соопшти на татка си.

¹³Кога Лаван ја чу веста за Јакова, за синот на својата сестра, му истрча во пресрет. Го прегрна и го пољуби, па го доведе во својот дом. Му раскажа на Лавана сè што му се случи.

¹⁴А тогаш Лаван рече: „Навистина, ти си моја коска и мое месо!” И Јаков живееше кај него цел месец.

¹⁵Лаван му рече: „Зар ќе ми служиш бесплатно, зашто си ми внук од сестра! Кажи ми колку ќе бараш за наем?”

¹⁶А Лаван имаше две ќерки. На повозрасната името и беше Лија, а на помладата Рахила.

¹⁷Лија имаше слаби очи, а Рахила беше складна и убава на лице.

¹⁸Бидејќи Јаков се вљуби во Рахила, рече: „Ќе ти служам седум години за твојата помлада ќерка Рахила.”

¹⁹Лаван одговори: „Подобро да ти ја дадам тебе, отколку на некој туѓинец. Остани со мене!”

²⁰Така Јаков служеше, за Рахила, седум години, ама му се видоа, заради љубовта кон неа, како неколку дни.

²¹Потоа Јаков му рече на Лавана: „Дај ми ја мојата жена, зашто моето време се исполни, па сакам да влезам при неа.”

²²Лаван ги собра сите луѓе од местото и им даде гозба.

²³Но вечерта ја зеде својата ќерка Лија и неа ја воведе кај Јакова, и тој и пријде.

²⁴Лаван и ја даде својата слугинка Зелфа на ќерка си Лија за слугинка.

²⁵Кога бидна утро, а тоа, ете, Лија! Тогаш Јаков му рече на Лавана: „Зошто ми стори така! Зар не ти служев јас за Рахила? Зошто ме измами?”

²⁶Лаван одговори: „Во нашето место не е обичај помладата да се омажи пред повозрасната.

²⁷Заврши ја со неа свадбенава седмица, а тогаш ќе ти ја дадам и втората, за уште седум години служба при мене.” Јаков се согласи: ја сврши свадбената седмица.

²⁸Тогаш Лаван му ја даде и ќерка си Рахила за жена.

²⁹Лаван и ја даде својата слугинка Вала на ќерка си Рахила за слугинка.

³⁰Тогаш Јаков и пристапи на Рахила. Ја љубеше Рахила повеќе отколку Лија. И така му служеше на Лавана уште седум години.

³¹Господ виде дека Лија не е љубена, па ја направи плодна, додека Рахила остана неротка.

³²Лија зачна и роди син; му го даде името Рувим, а тоа значи, како што протолкува таа: „Господ ја виде мојата неволја и затоа сега мојот маж ќе ме љуби.”

³³Пак зачна и роди син, па изјави: „Господ чу дека не сум љубена, затоа ми го даде и овој, и го нарече Симеон.”

³⁴Пак зачна и роди син, па изјави: „Сега мојот маж ќе се приврзе кон мене: му родив три сина.” Затоа го нарекоа со името Левиј.

³⁵А кога зачна уште еднаш и роди син, изјави: „Ќе го фалам Господа овој пат.” Затоа на синот му даде име Јуда. И прекрати да раѓа.