Read Библија, Константинов Битие (1 Moj.) 4 Bible Online

Битие (1 Moj.) 4 - Библија, Константинов bible

Битие (1 Moj.) 4

¹Адам ја позна својата жена Ева, а таа зачна и го роди Каина, па рече: „Добив машко чедо со помош на Господа!”

²Потоа го роди Авела, братот Каинов; Авел стана сточар, а Каин земјоделец.

³И еден ден Каин Му принесе на Господа жртва од плодовите на земјата.

⁴А и Авел принесе од првородените на својот добиток, и од мрсното. Господ погледна милостиво на Авела и на неговата жртва,

⁵а ни поглед не сврти кон Каина и неговата жртва. Затоа Каин се налути многу, и лицето му се смени.

⁶И Господ му рече на Каина: „Зошто си лут? Зошто ти е сменето лицето?

⁷Зашто ако работиш право, светиш од насмеаност. А ако не работиш право, гревот ти лежи пред врата, што дебне врз тебе; но ти уште можеш да му се спротивиш.”

⁸Каин пак му рече на својот брат Авел: „Ајде да излеземе!” И откако се најдоа во полето, Каин скокна на брата си Авела и го уби.

⁹Потоа Господ го праша Каина: „Каде е брат ти Авел?” „Не знам - одговори - зар сум јас чувар на својот брат?”

¹⁰Господ продолжи: „Што направи? Слушај! Крвта на твојот брат вика кон Мене од земјата.

¹¹Затоа биди проклет на земјата, што ја отвори устата за да ја прими крвта на брата ти, од твојата рака!

¹²Ќе ја обработуваш земјата, но таа веќе не ќе ти го дава својот род. Ќе бидеш вечен скитник на земјата!”

¹³А Каин Му рече на Господа: „Мојата казна е премногу тешка, за да се поднесува.

¹⁴Еве, денес ме тераш од плодната почва; треба да се кријам од Твоето лице и да бидам вечен скитник на земјата - кој ќе ме најде, може да ме убие.”

¹⁵А Господ му рече: „Не! Туку кој ќе го убие Каина, врз него ќе биде извршена седмократна одмазда!” И Господ му стави знак на Каина, за да не го убие некој, кој ќе го сретне.

¹⁶Каин отиде од пред Господовото лице во земјата Нод, источно од Еден, и таму се насели.

¹⁷Каин ја позна својата жена, па таа зачна и го роди Еноха.

¹⁸На Еноха му се роди Ирад, а од Ирада потекнува Мехујаил; од Мехујаила потекнува Метусаил; од Метусаила, Ламех.

¹⁹Ламех зеде две жени. Едната се викаше Ада, а другата Села.

²⁰Ада го роди Јавала, кој стана прататко на оние што живеат под шатори со добитокот.

²¹Името на брата му беше Јувал. Тој е прататко на сите кои свират на харфа и кавал.

²²Села го роди Тувал-Каина, прататко на оние, кои коват орудија од бронза и железо. Името на Тувал-Каиновата сестра и беше Наама.

²³Ламех им рече на своите жени: „Адо и Село, послушајте го мојот глас; Ламехови жени, чујте ја мојата беседа: убив човек, зашто ме рани, и дете, зашто ме удри.

²⁴Ако Каин биде одмазден седмократно, Ламех ќе биде седумдесет и седумкратно!”

²⁵Адам ја позна својата жена, па таа роди син и му го даде името Сит. Таа рече: „Бог ми даде друго дете место Авела, кого Каин го уби.”

²⁶На Сит му се роди син, кому тој му го даде името Енос. Тогаш почнаа да го повикуваат Господовото име.