Read Библија, Константинов Битие (1 Moj.) 49 Bible Online

Битие (1 Moj.) 49 - Библија, Константинов bible

Битие (1 Moj.) 49

¹Потоа Јаков ги повика сите свои синови и рече: „Соберете се, за да ви кажам што ќе биде со вас во идните времиња:

²Соберете се, чујте, Јаковови синови, послушајте го татка си Израел!

³Ти, Рувиме, првороденец мој, ти си моја тврдина, првенец на мојата сила. Се истакнуваш со достоинство, се истакнуваш со сила.

⁴Но, буен како вода, не ќе имаш повеќе првенство, зашто го оскверни леглото на татка си, и ја онечисти мојата постела.

⁵Симеон и Леви се браќа! Мечевите им се оружје на насилство.

⁶Јас не учествував во нивните советувања, не зедов дел во нивните собранија! Во својот гнев убиваа луѓе; во бес ги пресекоа жилите на воловите.

⁷Проклет да им е гневот, зашто беше прежесток! Проклета да им е јароста, зашто беше пресурова! Ќе ги разделам во Јакова, ќе ги распрснам низ Израел.

⁸Јудо! Твоите браќа ќе те слават, раката ти е секогаш врз вратот на непријателот, синовите на татка ти ќе ти се поклонуваат.

⁹Јудо, лавче младо! Си се здебелил, сине, од лов; клекна, легна како лав и како лавица: кој ќе го разбуди?

¹⁰Нема да се оддалечат од Јуда: ни царското жезло, ниту владетелската палка од кај неговите нозе, додека не дојде Оној, кому Му припаѓа, кому ќе Му се покорат народите.

¹¹Го врзува своето ждребе за лозата, а неговото младо осле за племенита пенушка. Тој ја пере својата облека во вино, својата носија во крвта на грозјето.

¹²Неговите очи ќе црвенеат од вино, забите ќе белеат од млеко.

¹³Завулон ќе живее покрај морскиот брег, ќе биде пристаниште на бродови и ќе граничи со Сидон.

¹⁴Исахар е јако осле, легнато меѓу оградите.

¹⁵Виде дека починката е пријатна, а земјата убава, па ги подметна своите плеќи под бреме и се согласи со потчинетост.

¹⁶Дан ќе го суди својот народ, како секое Израелево племе.

¹⁷Дан нека биде змија на патот, отровница покрај патека, што ќе го касне коњот за ногата, така што јавачот ќе падне назад.

¹⁸Господи, се надевам на Твоето спасение!

¹⁹Разбојниците ќе го ограбуваат Гад, но и тој со грабеж ќе им биде зад петиците.

²⁰Кај Асира ќе има леб, и ќе доставуваат царски слатки.

²¹Нефталим е брза срна, што говори убави зборови.

²²Јосиф е плодоносна гранка, плодна гранка покрај извор, гранчињата и се простираат над ѕидот.

²³Стрелци го огорчија, стрелаа на него, и го гонеа.

²⁴Но неговиот лак останува цврст, мишките му зајакнаа, преку рацете на Силниот Јаковов, преку името на Пастирот, на Израелевата Стена,

²⁵Од Бога, твој Татко, Кој ќе ти помага, преку Сèсилниот, Кој ќе те благословува со небесни благослови одозгора, со благослови на бездната одоздола, со благослови на градите и на утробите !

²⁶Со благословите на татка ти, што ги надвишуваат благословите на старите гори и убавините на вечните брегови - тие нека се спуштат врз Јосифа, на посветениот меѓу браќата!

²⁷Венијамин е граблив волк, наутро ќе го јаде ловот, а навечер ќе го дели пленот.”

²⁸Сите тие беа Израелеви племиња - дванаесет на број - и тоа им го рече таткото кога ги благословуваше; секого од нив го благослови со негов благослов.

²⁹И тој им заповеда: „Скоро ќе им се придружам на своите луѓе. Погребете ме покрај моите татковци,

³⁰во пештерата, што се наоѓа во нивата на Ефрон, Хетеецот, во пештерата на полето Махпела, спроти Мамвриј, во Ханаанската Земја, која Авраам ја купи со нивата на Хетеецот Ефрон за место за погребување.

³¹Таму беа погребани Авраам и жена му Сара; таму беа погребани Исак и жена му Ревека; таму јас ја погребав Лија.

³²Нивата и пештерата, во неа, се купени од Хетеевите синови.”

³³Кога Јаков им ги кажа заповедите на своите синови, ги повлече нозете на постела и издивна - им се придружи на своите луѓе.