Read Библија, Константинов Битие (1 Moj.) 5 Bible Online

Битие (1 Moj.) 5 - Библија, Константинов bible

Битие (1 Moj.) 5

¹Ова е книгата на родословието Адамово: кога Господ го создаде човекот, го направи според Божјото подобие;

²создаде машко и женско. А кога ги создаде, ги благослови и ги нарече - човек.

³Кога на Адама му беа сто и триесет години му се роди син, сличен нему, според неговиот лик и подобие, му го даде името Сит.

⁴По Ситовото раѓање, Адам живееше осум стотини години; и му се родија уште синови и ќерки.

⁵Адам поживеа вкупно девет стотини и триесет години. Потоа умре.

⁶Кога на Сит му беа сто и пет години, му се роди Енос.

⁷По Еносовото раѓање Сит живееше осум стотини и седум години, па му се родија уште синови и ќерки.

⁸Сит поживеа вкупно девет стотини и дванаесет години. Потоа умре.

⁹Кога на Енос му беа деведесет и три години, му се роди Кенан.

¹⁰По Кенановото раѓање, Енос поживеа осум стотини и петнаесет години, па му се родија уште синови и ќерки.

¹¹Енос поживеа вкупно девет стотини и пет години. Потоа умре.

¹²Кога Кенан имаше седумдесет години, му се роди Малалеил.

¹³По Малалеиловото раѓање, Кенан поживеа осум стотини и четириесет години, и му се родија уште синови и ќерки.

¹⁴Кенан поживеа вкупно девет стотини и десет години. И умре.

¹⁵Кога Малалеил наполни шеесет години, му се роди Јаред.

¹⁶По Јаредовото раѓање, Малалеил поживеа осум стотини и триесет години, та му се родија уште синови и ќерки.

¹⁷Малалеил живееше вкупно осум стотини деведесет и пет години. Потоа почина.

¹⁸Кога Јаред имаше сто и шеесет и две години, му се роди Енох.

¹⁹По Еноховото раѓање Јаред живееше осум стотини години, па му се родија уште синови и ќерки.

²⁰Јаред живееше вкупно девет стотини шеесет и две години. Потоа умре.

²¹Кога на Енох му беа шеесет и пет години, му се роди Матусал.

²²Енох одеше со Бога. По Матусаловото раѓање Енох живееше триста години, и му се родија уште синови и ќерки.

²³Енох поживеа вкупно триста шеесет и пет години.

²⁴Енох одеше со Бога, потоа исчезна; Бог го зеде.

²⁵Кога Матусал имаше сто осумдесет и седум години, му се роди Ламех.

²⁶По Ламеховото раѓање Матусал живееше седум стотини осумдесет и две години, па му се раѓаа уште синови и ќерки.

²⁷Матусал поживеа вкупно девет стотини шеесет и девет години. И умре.

²⁸Кога Ламех наполни сто осумдесет и две години, му се роди син.

²⁹Му го даде името Ное, велејќи: „Овој ќе нè утеши, во трудот и во напорот на нашите раце, од земјата, која Бог ја проколна.”

³⁰По Ноевото раѓање Ламех живееше петстотини деведесет и пет години, и му се раѓаа уште синови и ќерки.

³¹Ламех поживеа вкупно седум стотини седумдесет и седум години. Потоа почина.

³²Откако Ное поживеа пет стотини години, му се родија Сим, Хам и Јафет.