Read Библија, Константинов 1 Летописи 18 Bible Online

1 Летописи 18 - Библија, Константинов bible

1 Летописи 18

¹Потоа Давид ги порази Филистејците и ги покори, та го одзеде Гат со неговите села од филистејските раце.

²Ги порази и Моавците, и тие станаа Давидови поданици кои му донесуваа данок.

³Давид го порази и Адад-Езера, совскиот цар во Емат, кога излезе да ја утврди својата власт до реката Еуфрат.

⁴Давид зароби од него илјада бојни коли, седум илјади коњаници и дваесет илјади пешаци; им ги пресече петичните жили на сите коњи на бојните коли, остави само сто.

⁵Дамаските Арамејци му беа дошле на помош на Адад-Езер, ама Давид погуби меѓу Арамејците дваесет и две илјади луѓе.

⁶Постави намесник во Арамејскиот Дамаск. Така Арамејците станаа Давидови поданици и требаа да му плаќаат данок. Господ му даваше победа на Давида каде и да одеше.

⁷Давид ги заплени златните штитови што ги имаа Адад-Езеровите слуги, и ги донесе во Ерусалим.

⁸И од Адад-Езеровите градови Тиват и Хун однесе многу бронза, од која Соломон го направи бронзеното море, столбовите и бронзените посатки.

⁹Кога ематскиот цар Тој чу дека Давид ја порази целата војска на Адад-Езера, совскиот цар,

¹⁰му го испрати на Давида својот син Адорам за да го поздрави и за да му честита, зашто војуваше против Адад-Езера и зашто го порази, бидејќи Тој беше во војна со Адад-Езер; и за да му однесе секакви златни, сребрени и бронзени предмети.

¹¹И нив Давид му ги посвети на Господа со среброто и златото што го имаше земено од сите народи, од Едомците, од Моавците, од Амонците, од Филистејците и од Амаликците.

¹²Серуиниот син Ависај погуби осумнаесет илјади Едемци во Солената Долина.

¹³Давид постави намесници по Едом. Така сите Едомци станаа Давидови слуги. И каде и да одеше Давид, Господ му даваше победа.

¹⁴Давид царуваше над сиот Израел правејќи му право и правда на сиот свој народ.

¹⁵Серуиниот син Јоав беше заповедик на војската; синот Ахилудов беше таен советник.

¹⁶Синот Ахитовов Садок и синот Авимелехов беа свештеници, Суса писар.

¹⁷Синот Јодаев Венаја беше над Херетците и над Фелетците, а Давидовите синови беа први до царот.