Read Библија, Константинов 2 Летописи 15 Bible Online

2 Летописи 15 - Библија, Константинов bible

2 Летописи 15

¹Тогаш Божјиот Дух слезе на Одидовиот син Азариј.

²Тој излезе пред Аса и му рече: „Чујте ме, Асо и сето Јудино и Венијаминово племе! Господ е со вас, зашто вие сте со Него; и ако го барате, ќе Го најдете; ако Го оставите, и Тој ќе ве остави вас.

³Долго Израелците беа без вистинскиот Бог и без свештеник - учител и без Закон.

⁴Кога во неволја Му се обратија на Господа, на Израелевиот Бог, и почнаа да Го бараат, Го најдоа.

⁵Во тоа време никој не можеше ни да излегува ни да доаѓа, зашто големи немири владееја меѓу сите земни жители.

⁶Народ удираше против народ, град против град, зашто Господ ги смути со секаква неволја.

⁷Но вие бидете храбри, и рацете нека не ви ослабат, зашто има награда за вашите дела.”

⁸Откако ги чу тие слова и пророчката беседа на синот на пророкот Одид, Аса се охрабри и ги отстрани киповите на гнасните нечисти божества од цела Јудеја и од Венијаминовата Земја, и од градовите кои ги имаше освоено во Ефремовата Гора. Го обнови и Господовиот жртвеник, што беше пред Господовиот Трем.

⁹Тогаш ги собра сето Јудино и Венијаминово племе и придојдениците, кои беа кај нив од Ефремовото, Манасиевото и Симеоновото племе, зашто мнозина од Израелците пребегаа кај него кога видоа дека со него е Господ, неговиот Бог.

¹⁰И се собраа во Ерусалим во третиот месец на петнаесеттата година на Асиното царување.

¹¹Во оној ден Му принесоа жртви на Господа од пленот што го дотераа, седум стотини говеда и седум илјади ситен добиток.

¹²Се заветуваа дека ќе Го бараат Господа, Бога на своите татковци, со сето срце и со сета душа.

¹³А секој што не би Го барал Господа, Израелевиот Бог, да биде погубен, било мал или голем, маж или жена.

¹⁴Му се заколнаа на Господа гласно и покрај грмливо извикување, покрај труби и рогови.

¹⁵Сите Јудејци се радуваа заради таа заклетва и со сета своја волја Го бараа и Го најдоа. Господ им даде мир од сите страни.

¹⁶Царот Аса ја отстрани од власта и својата мајка Маха, зашто и направи гаден идол на Ашера. Аса го исече нејзиниот гад, го сотре и го изгоре при потокот Кедрон.

¹⁷Но високите места не беа отстранети од Израел. Сепак Асиното срце Му беше приврзено на Господа за време на сиот негов живот.

¹⁸Ги внесе во Божјиот Дом посветените дарови на својот татко, и своите посветени: сребро и злато и посатки.

¹⁹Немаше војна сè до триесет и петтата година на Асиното царување.