Read Библија, Константинов Излез (2 Moj.) 21 Bible Online

Излез (2 Moj.) 21 - Библија, Константинов bible

Излез (2 Moj.) 21

¹„Ова се прописите што треба да им ги изложиш:

²Ако купиш еден Евреин за роб, нека служи шест години. На седмата година нека замине, без откупнина, слободен.

³Ако дојде сам, сам и нека си замине; ако е женет, со него нека отиде и неговата жена.

⁴Ако господарот му набавил жена, па таа му роди било синови било ќерки, и жената и нејзините деца нека му припаднат на нејзиниот господар, а тој нека си отиде сам.

⁵Ама ако робот изјави отворено: ‘Ги љубам својот господар, својата жена и своите деца, не сакам да бидам слободен,’

⁶тогаш неговиот господар нека го доведе при судиите. Кога ќе го доведе до вратата или до столбот на вратата, господарот нека му го дупне увото со шило и нека му остане трајно во служба.

⁷Кога човек ќе ја продаде ќерка си за робинка, таа нека не се ослободува како и машките робови.

⁸Ако не му се допадне на својот господар, кој ја одредил за себеси, нека ја остави да се откупи. Нема право да ја продаде на странци, кога не и бил верен.

⁹А ако ја одреди за својот син, нека постапува со неа како и со ќерка.

¹⁰Ако се ожени со друга, не смее на првата да и ги крати: храната, облеката или нејзините брачни права.

¹¹Ако не и ги прави овие три работи, нека е слободна и нека отиде без откупнина.”

¹²„Кој ќе удри човек па го усмрти, нека биде казнет со смрт.

¹³Ама ако го направил тоа ненамерно, туку Бог пуштил да падне во неговата рака, ќе ти одредам место каде може да побегне.

¹⁴Кој намерно ќе се нафрли врз својот ближен и го убие подмолно, одвлечи го и од мојот жртвеник, за да биде погубен.

¹⁵Кој ќе ги удри својот татко или својата мајка, нека биде казнет со смрт.

¹⁶Кој ќе грабне човек - било за да го продаде, било за да го задржи во своја власт - нека биде казнет со смрт.

¹⁷Кој ќе ги проколне татка си или мајка си нека биде погубен.”

¹⁸„Ако се степаат луѓе, па еден од нив го удри другиот со камен или со рака, ама овој не загине, туку падне во постела,

¹⁹но после стане и може да излегува, макар и со стап, тогаш нека му биде простено на оној кој го удрил, само нека му го плати неговиот губиток на времето и му прибави целосно исцелување.

²⁰Ако некој го удри со стап својот роб или својата робинка па умре под неговата рака, треба да ја поднесе одмаздата.

²¹Но ако робот преживее ден-два, нека не се спроведува одмаздата, зашто робот е негова сопственост.

²²Ако се степаат луѓе и удрат трудна жена, па таа пометне, но нема друга штета, тогаш оној кој ја удрил нека ја плати оштетата што ќе ја побара нејзиниот маж. Тој нека плати како што ќе одредат судиите.

²³Има ли друго зло, казната нека биде: живот за живот,

²⁴око за око, заб за заб, рака за рака, нога за нога,

²⁵изгореница за изгореница, рана за рана, синило за синило.

²⁶Ако некој ги удри својот роб или својата робинка во око и го упропасти, нека го ослободат заради окото.

²⁷Ако му избие заб на својот роб - или на својата робинка - нека го ослободи заради забот.

²⁸Кога вол боцне маж или жена па ги усмрти, нека се каменува со камења. Тогаш неговото месо не смее да се изеде, а на неговиот сопственик нека му биде простено.

²⁹Ама ако тоа добиче боцкаше и пред тоа, а неговиот сопственик, иако опоменуван, не го чувал, па тоа усмрти маж или жена, тоа добиче нека биде каменувано; а и неговиот сопственик има да биде погубен.

³⁰Ако на сопственикот му биде одредена откупна цена, за да го откупи својот живот, нека плати колку ќе му се одреди.

³¹Ако волот убоде дете или девојче нека се постапи со него исто според ова правило.

³²Ако боцне роб или робинка, нека сопственикот им исплати на нивниот господар триесет сребрени сикли, а добичето нека биде каменувано.

³³Ако некој остави отворена јама, или некој ископа кладенец и не го покрие, па во него падне добиче или осле, сопственикот на кладенецот ќе даде надомест:

³⁴нека му исплати на сопственикот со сребро, а пцовисаното животно нека му припадне нему.

³⁵Кога нечиј вол боцне вол на друг па тој пцовиса, тогаш нека го продадат живиот вол, а добиените пари нека ги поделат; и пцовисаното добиче нека го поделат меѓу себе.

³⁶Ама ако се знае дека тој вол боцкал и порано, а неговиот господар не го чувал, тогаш треба да надомести вол за вол, додека пцовисаното животно ќе биде негово.”