Read Библија, Константинов Излез (2 Moj.) 25 Bible Online

Излез (2 Moj.) 25 - Библија, Константинов bible

Излез (2 Moj.) 25

¹Господ му рече на Мојсеја:

²„Кажи им на Израелците да Ме даруваат, а вие примајте ги даровите во Моја чест од секој што дава од срце.

³А примајте ги овие дарови: злато, сребро и бронза;

⁴љубичесто, црвено и темноцрвено предено и препреден лен;

⁵готови овновски кожи, па убави кожи; ситимово дрво;

⁶масло за осветлување; мириси за масло за помазание и за мирисливо кадење;

⁷оникс и други бесцени камења, што ќе бидат вметнати во наплеќникот и врзградникот.

⁸Нека Ми изградат Светилиште, за да можам да престојувам меѓу нив.

⁹При градењето на Престојувалиштето и на сè во него, постапи точно според образецот што ќе ти го покажам.”

¹⁰„Нека направат ковчег од багремово дрво: долг два ипол лакти, широк лакот ипол и висок лакот ипол.

¹¹Опкови го со чисто злато, опкови го однадвор и внатре; а околу него стави завршен појас од злато.

¹²Излеј за него четири златни колца од едната страна, а две колца од другата.

¹³Направи и две ластегарки од багремово дрво и опкови ги со злато.

¹⁴Потоа провни ги ластегарките низ колцата од страната на Ковчегот, за да биде носен Ковчегот врз нив.

¹⁵Нека останат ластегарките во колцата на Ковчегот; нека не се извлекуваат.

¹⁶Сведоштвото што ќе ти го дадам, положи го во Ковчегот.

¹⁷Очистилиштето направи го исто така од чисто злато. Нека биде долго два ипол лакти, а широко лакот ипол.

¹⁸Искови и два херувима од злато за двата краја на Очистилиштето.

¹⁹Направи еден херувим за едниот крај, а другиот херувим за другиот крај. Прицврсти ги на двата краја на Очистилиштето, да составуваат еден дел со него.

²⁰Херувимите нека ги рашират своите крилја во височина така што ќе го засолнуваат со крилјата Очистилиштето. Нека бидат со лицето свртени еден кон друг, ама така да лицата на херувимите гледаат во Очистилиштето.

²¹Очистилиштето стави го на Ковчегот, а во Ковчегот положи ги плочите на Сведоштвото што ќе ти ги дадам.

²²Тука ќе се состанувам Јас со тебе и одозгора, од над Очистилиштето - меѓу оние два херувима што се на Ковчегот на плочите на Сведоштвото - ќе ти ги соопштувам сите заповеди наменети на Израелците.”

²³„Направи стол од багремово дрво долг два лакта, широк лакот, а висок лакот ипол.

²⁴Опкови го со чисто злато и направи му наоколу завршен појас од злато.

²⁵Направи му раб широк една дланка, а потоа врз работ стави завршен појас од злато.

²⁶Натаму, исправи ги неговите четири колца од злато па прицврсти му ги на неговите четири ножни агли.

²⁷Колцата нека се непосредно под работ, за да служат како рачки за носење на столот.

²⁸Направи ги ластегарките од багремово дрво и опкови ги со злато. Столот ќе биде носен на нив.

²⁹Потоа направи за него: чинии, варилки, врчви и чаши за излевање на приносите. Направи ги од чисто злато.

³⁰На столот секогаш пред Моето лице ставај положени лебови.”

³¹„Направи светилник од чисто злато. Светилникот нека биде искован. Неговото подножје, неговото стебло, неговите чаши, чашки и цветови - сè нека биде од еден дел.

³²Шест гранки нека му излегуваат од страните: три гранки од едната страна на светилникот, а три гранки од другата страна на светилникот.

³³На едната гранка нека бидат три чаши во облик на бадемов цвет, секоја со чашка и цвет. Така за сите шест гранки што излегуваат од стеблото на светилникот.

³⁴На самиот светилник нека бидат четири чаши во облик на бадемов цвет, секоја со чашка и цвет.

³⁵Една чашка под двете гранки, создавајќи едно парче со нив; потоа чашка под другите две гранки, од едно парче со нив. Така за сите шест гранки што излегуваат од светилникот.

³⁶Нивните чашки и нивните кракови ќе составуваат едно парче со нив - сè исковано во едно парче од чисто злато.

³⁷Направи и седум светилки за нив. Светилките нека бидат поставени така што ќе го осветлуваат пространството однапред.

³⁸Машичките и пепелниците за нив нека се од чисто злато.

³⁹Употреби еден талант чисто злато за светилникот и за сиот негов прибор.

⁴⁰Внимавај! Направи ги според образецот што ти беше покажан на гората.”