Read Библија, Константинов Излез (2 Moj.) 26 Bible Online

Излез (2 Moj.) 26 - Библија, Константинов bible

Излез (2 Moj.) 26

¹„Шаторот направи го од десет завеси: од љубичесто, црвено и темноцрвено предено и од препреден лен. На нив нека бидат извезени ликови на херувими - дело на уметник.

²Должината на секоја завеса нека е дваесет и осум лакти, широчината нека и е четири лакти. Сите завеси нека се со иста мерка.

³Пет завеси нека се составени една со друга, а другите пет завеси пак една со друга.

⁴Направи петелки од љубичеста волна при работ на крајната завеса во составеното парче.

⁵Направи педесет петелки на работ на другата.

⁶Тогаш направи педесет златни куки. Потоа завесите да бидат составени една со друга со куките. Така Шаторот ќе биде една целина.

⁷Направи потоа завеси од козина за Шатор, за Покрив на Шаторот. Направи ги единаесет.

⁸Нека должината на секоја завеса биде триесет лакти, а широчината на секоја завеса четири лакти. Тие единаесет завеси нека бидат со иста мерка.

⁹Состави пет завеси одделно, а тогаш пак другите шест завеси одделно. Шестата завеса свиткај ја во две на предниот дел на Шаторот.

¹⁰Сошиј педесет петелки на работ на едното составено парче на завесата, а педесет куки на работ на другото.

¹¹Изработи педесет куки од бронза, закачи ги куките во петелките, за да го составиш Покривот во целина.

¹²А бидејќи од завесите на Шаторот ќе остане вишок, половина од завесите што се вишок нека се спушта на задниот дел на Шаторот.

¹³Од она што е отповеќе во должината на шаторските завеси, нека виси по еден лакот од двете страни на светиот Шатор, за да го покрива.

¹⁴Најпосле направи му на Шаторот покрив од приготвени и со црвено обоени овновски кожи, а врз него покрив од убави кожи.

¹⁵Даските за Шаторот, што ќе стојат исправени нагоре, направи ги од багремово дрво.

¹⁶Секоја даска нека биде долга десет лакти, а широка лакот ипол.

¹⁷Секоја даска нека има два клина, за да ја држат исправена. Така направи на секоја даска за Шаторот.

¹⁸Даските за Шаторот постави ги: дваесет даски на југ, кон пладне;

¹⁹тогаш под дваесетте даски направи четириесет подножја од сребро, две подножја под првата даска за нејзините два клина, и така редум, две подножја за два клина на секоја идна даска.

²⁰За другата страна на Шаторот, на север: дваесет даски

²¹и четириесет сребрени подножја, две подножја за два клина на првата даска, и така редум, две подножја за секоја даска.

²²На задната страна на Шаторот на запад, постави шест даски.

²³Направи и даски за задните агли на Шаторот.

²⁴Нека бидат разделени при дното, ама на врвот кај првото колце нека бидат составени. Нека така двете прават два агли.

²⁵И така нека бидат осум даски со нивните сребрени подножја: шеснаесет подножја, две подножја под првата даска, а пак две подножја под секоја следна даска.

²⁶Натаму направи лостови од багремово дрво: пет од нив за даските од едната страна на Шаторот,

²⁷а пет лостови од другата страна на Шаторот; тогаш пет лостови за даските на Шаторот од одназад, кон запад.

²⁸Средниот лост нека врви по средината на даските од едниот крај до другиот.

²⁹Даските да ги опковеш во злато, а и колцата за нив, низ кои ќе се провлечуваат лостовите, направи ги од злато.

³⁰Значи така, издигни го Шаторот според нацртот што ти беше покажан на гората.

³¹Направи завеса од љубичесто, црвено и темноцрвено предено и од препреден лен. Нека се навезени херувими врз неа.

³²Обеси ја на четири столба од багремово дрво, обложено со злато, со куки од злато, а врз четири подножја од сребро.

³³Обеси ја завесата на куките. Тогаш внеси го Ковчегот на сведоштвото тука зад завесата. Така завесата нека ти го одделува Светилиштето од Светилиштето над Светилиштата.

³⁴Стави го Шаторот над Ковчегот на сведоштвото во Светината над светините.

³⁵Потоа стави го столот надвор од пред завесата, а светилникот на јужната страна на Шаторот, спроти столот. Стави го столот на северната страна.

³⁶А на влезот во Шаторот направи завеса од љубичесто, црвено и темноцрвено предено и од препреден лен - везана со вез.

³⁷Изделкај пет столпчиња од багремово дрво за завесата, па опкови ги со злато. Куките за нив нека бидат од злато. Одлеј за нив пет подножја од бронза.”