Read Библија, Константинов Излез (2 Moj.) 30 Bible Online

Излез (2 Moj.) 30 - Библија, Константинов bible

Излез (2 Moj.) 30

¹„Направи и жртвеник за палење на темјан; направи го од багремово дрво.

²Нека биде долг лакот, широк лакот, четвртест, и висок два лакта. Рожињата нека му бидат од едно парче со него.

³Да ги опковеш со чисто злато: неговата горна рамнина, неговите страни наоколу и неговите рожиња. Направи му завршен појас наоколу.

⁴Направи му и две златни колца. Прицврсти му ги на двете спротивни страни под завршниот појас. Низ нив ќе се провнуваат ластегарките за носење.

⁵Ластегарките направи ги од багремово дрво и опкови ги со злато.

⁶Постави го жртвеникот пред завесата што го засолнува Ковчегот на Сведоштвото - спроти Очистилиштето (Капак) над Сведоштвото - каде што Јас ќе се среќавам со тебе.

⁷Арон нека кади врз него со благомирислив темјан секое утро кога ги подготвува светилките:

⁸Арон нека кади пак во примрак, кога ги запалува светилките, за да биде тоа секогашно кадилно принесување пред Господа во сите ваши поколенија.

⁹Не принесувај врз него ни непосветен темјан, ни паленици, ни приносници, ниту излевници!

¹⁰Еднаш годишно Арон нека го изврши обредот на помирување на неговите рожиња. Обредот за помирување на жртвеникот нека го изврши со крвта на жртвата што се принесува за грев, еднаш годишно. Така правете во сите поколенија. Зашто жртвеникот е пресвета светина на Господа.”

¹¹Натаму Господ му рече на Мојсеја:

¹²„Кога ќе правиш попис на Израелците, при утврдувањето на нивниот вкупен број, нека секој Му даде на Господа откуп за себе, кога ќе се запише, за да не ги снајде некакво зло заради пребројувањето.

¹³Секој што потпаѓа под пребројувањето, нека даде: половина сикал - според храмскиот сикал, што има дваесет гери во сикал. Таа половина сикал нека биде како принос на Господа.

¹⁴Секој што потпаѓа под пребројувањето, од дваесет години возраст па нагоре, нека Му даде принос на Господа.

¹⁵Богатиот нека не плаќа повеќе ниту сиромавиот помалку од половина сикал, кога ќе Му даваат принос на Господа како откуп за себе.

¹⁶Земај откупни сребреници од Израелците и употребувај ги за служба во Шаторот на средбата. Тоа нека Му биде за спомен на Господа, за да си спомнува за Израелците и за откуп на вашите души.”

¹⁷Господ му рече на Мојсеја:

¹⁸„Направи мијалник од бронза и подножје од бронза за миење. Постави го меѓу Шаторот на средбата и жртвеникот. Тури вода во него,

¹⁹па Арон и неговите синови нека ги мијат своите раце и нозе со водата од него.

²⁰Кога треба да влегуваат во Шаторот на средбата, или кога треба да се приближуваат до жртвеникот за служба, за да изгоруваат жртви паленици во чест на Господа, нека се измијат со вода, за да не загинат.

²¹Нека ги измијат своите раце и своите нозе, за да ја избегнат смртта: тоа е траен правилник за него и за неговите потомци во сите поколенија.”

²²Уште му рече Господ на Мојсеја:

²³„Набави најубави мириси: пет стотини сикали најчиста смирна, половина од таа тежина - двеста и педесет - мирислив цимет, двеста и педесет мирислива трска,

²⁴пет стотини - според храмскиот сикал - ловор и еден ин маслиново масло.

²⁵Направи од тоа посветено масло за помазание; маст приготвена според искуството на мироварач. Тоа нека биде миро за помазание.

²⁶Потоа помажи го со тоа: Шаторот на средбата и Ковчегот на Сведоштвото,

²⁷столот и сиот негов прибор; светилникот и сиот негов прибор, и кадилниот жртвеник;

²⁸жртвеникот за жртви паленици и сиот негов прибор; мијалникот и неговата потпирка:

²⁹посвети ги, и тие така ќе станат посветени, и што и да се допре до нив, ќе стане посветено.

³⁰Помажи ги Арона и неговите синови и посвети Ми ги Мене за свештеници.

³¹Тогаш речи им на Израелците вака: ‘Ова е Мое свето миро за помазание од поколение до поколение.

³²Не смее да се излева врз телото на обичниот човек; не смеете да правите друго со ваков состав! Тоа е посветено, и нека ви биде свето!

³³Кој направи такво, или кој ќе стави од него врз туѓинец, нека биде отстранет од својот народ!’”

³⁴Уште му рече Господ на Мојсеја: „Набави мириси: стакта, оникс и халван. Од овие мириси и од чист темјан,

³⁵сè во еднакви делови, направи темјан за кадење, смеса од мириси каква што прави мирисоправачот, измиена, чиста, света.

³⁶Од тоа столчи малку на ситно во прав и еден дел стави пред Сведоштвото, во Шаторот на средбата, каде што Јас ќе се среќавам со тебе. Сметајте го овој темјан за пресвет!

³⁷А темјанот што ќе го направиш според овој состав, не смеете да го правите за своја употреба. Тоа нека ти биде светина за Господа!

³⁸Кој ќе си направи нешто такво за да му мириса, нека биде истребен од својот народ.”