Read Библија, Константинов Излез (2 Moj.) 35 Bible Online

Излез (2 Moj.) 35 - Библија, Константинов bible

Излез (2 Moj.) 35

¹Мојсеј ја свика целата заедница на Израелевите синови па им рече: „Господ ви наложи да го правите ова:

²Работата нека се извршува шест дена. Седмиот ден нека ви биде свет ден, ден за целосна починка во чест на Господа. Секој што ќе работи во тој ден, нека биде казнет со смрт.

³Во саботен ден не палете ни оган во своето престојувалиште.”

⁴Натаму Мојсеј и рече на целата израелска заедница: „Господ го нареди ова:

⁵Соберете меѓу себе принос за Господа! Секој со племенито срце нека Му донесе принос на Господа: злато, сребро и бронза;

⁶љубичесто, црвено и темноцрвено предено и препреден лен;

⁷направени овенски кожи, потоа јазовечки кожи, багремово дрво,

⁸масло за осветление, мириси за масло за помазание и благомирислив темјан;

⁹оникс и други бесцени камења за вметнување во наплеќникот и врзградникот.

¹⁰А сите кои се вешти меѓу вас, нека дојдат да прават што нареди Господ:

¹¹Шаторот, неговиот покрив, и неговиот горен покрив, неговите куки и даски, неговите лостови и столпчиња; неговите подножја;

¹²неговиот Ковчег и ластегарките; Очистилиштето, па завесата за засолнување;

¹³столот со неговите ластегарки и со сите негови прибори; принесените лебови;

¹⁴светилник за осветлување, неговиот прибор и неговите светилки, потоа масло за осветление;

¹⁵кадилниот жртвеник и неговите ластегарки; миро и благомирислив темјан; завесата за влезот во Шаторот;

¹⁶жртвеник за жртвите паленици со неговата решетка од бронза; ластегарките за него и сиот негов прибор; мијалникот и неговата потпирка;

¹⁷завесите за дворот; столбовите и нивните подножја, па завесата при влезот во дворот;

¹⁸колчињата за Шаторот и колчињата за дворот со нивните врвци;

¹⁹свеченото руво за вршење служба во Светилиштето - посветената облека за свештеникот Арон и облеките за свештеничка служба на неговите синови.”

²⁰Тогаш целата израелска заедница се повлече од пред Мојсеја.

²¹А тогаш секој, кого срцето го влечеше и душата го поттикнуваше, дојде носејќи го својот принос во чест на Господа за градба на Шаторот на средбата, за секоја служба во него и за посветените облеки.

²²Се стрчаа мажите и жените: сите кои срцето ги влечеше донесоа: запнувачки, обетки, прстења, нараквици, огрлици и разновидни златни накити; сите што имаа заветувано некаква златна работа во чест на Господа.

²³Сите кај кои се најдоа љубичесто, црвено и темноцрвено предено и препреден лен, направени овновски кожи или јазовечки кожи, го донесоа своето.

²⁴Натаму, секој што можеше да даде некаков дар во сребро или во бронза, го донесе тоа како принос во чест на Господа. Секој кај кого се најде багремово дрво за употреба во која и да е работа, го донесе.

²⁵Сите жени кои беа вешти предеа со своите раце и го донесуваа тоа што го испредоа: љубичесто, црвено и темноцрвено предено и препреден лен.

²⁶Сите жени пак, кои ги поттикнуваше нивното срце заради нивната вештина, предеа козина.

²⁷Главатарите донесуваа оникс и други бесцени камења за вметнување во плеќникот и врзградникот;

²⁸па мириси и масло за осветление, миро за помазание и благомирислив темјан.

²⁹И така Израелците - сите мажи и сите жени, кои ги поттикнуваше срцето да придонесат што и да е за работата што Господ ја нареди преку Мојсеја да биде извршена - го донесоа тоа како доброволен принос во чест на Господа.

³⁰Потоа Мојсеј им рече на Израелците: „Гледате! Господ го назначи по име Веселеила, Уриевиот син, од Оровото колено, а од Јудиното племе.

³¹Го исполни него со Божји Дух, мудрост, му даде разум и секаква вештина:

³²да замислува нацрти и да извршува работи од злато, сребро и бронза;

³³да реже бесцени камења за вметнување; да копаничи во дрво и да ја работи искусно својата работа.

³⁴Нему и на Елијав, Ахисамаховиот син, од Дановото племе, им додели и способност да ги поучуваат другите.

³⁵Ги надари со умеење во секоја работа: копаничарска, шивачка, везачка и ткаачка; тие ткаеја ткаенини од љубичесто, црвено и темноцрвено предено и од препреден лен, способни сè во секоја работа и вешти во уметнички изработки.”