Read Библија, Константинов Излез (2 Moj.) 37 Bible Online

Излез (2 Moj.) 37 - Библија, Константинов bible

Излез (2 Moj.) 37

¹Веселеил направи Ковчег од багремово дрво, долг два ипол лакти, широк лакот ипол, а висок лакот ипол.

²Одвнатре и однадвор го опкова со чисто злато. Наоколу му направи златен завршен појас.

³И му одлеа четири колца на неговите четири агли: две колца од едната страна, а две колца на неговата друга страна.

⁴Направи и ластегарки од багремово дрво и ги опкова со злато;

⁵потоа ги провлече ластегарките низ колцата на Ковчегот од страна, за носење на Ковчегот.

⁶Потоа направи Очистилиште од чисто злато, долго два ипол лакти, а широко лакот ипол.

⁷Направи и два херувима од ковано злато, на двата краја на Очистилиштето:

⁸еден херувим на едниот крај, а другиот херувим на другиот крај. Херувимите на двата краја ги направи од еден дел со Очистилиштето.

⁹Херувимите имаа издигнати и раширени крилја, го засолнуваа со нив Очистилиштето. Беа свртени со лицето еден кон друг, така што нивните лица им гледаа во Очистилиштето.

¹⁰Направи стол од багремово дрво, долг два лакти, широк еден лакот, а висок лакот ипол.

¹¹Го опкова со чисто злато и му направи раб од злато наоколу, завршен појас.

¹²И му направи раб наоколу, широк една дланка. А за работ наоколу направи завршен златен појас.

¹³Му излеа четири златни колца. Потоа ги прицврсти колцата за четирите негови ножни агли.

¹⁴Колцата беа непосредно под работ, како рачки за ластегарките, за да може столот да се носи.

¹⁵Ластегарките за носење на столот ги направи од багремово дрво и ги опкова со злато.

¹⁶А приборот што беше држан на столот - неговите чинии, кадилници, врчви и чаши за излевање на приносот - ги направи од чисто злато.

¹⁷Направи и светилник од чисто злато. Го искова светилникот - неговото подножје и стеблото. Неговите чаши - чашки и цветови - беа од еден дел со нив.

¹⁸Шест гранки излегуваа од неговите страни: три гранки на светилникот од едната страна, а три гранки на светилникот од другата страна.

¹⁹На едната гранка беа три чаши во облик на бадемов цвет, секоја со својата чашка и цвет. Така беше на сите шест гранки што излегуваа од светилникот.

²⁰На самиот светилник имаше четири чаши во облик на бадемов цвет, секоја со чашка и цвет:

²¹чашка, во еден дел со него, под првите две гранки; па конечно чашка, во еден дел со него, под двете задни гранки. Така на сите шест гранки што излегуваа од него.

²²Нивните чашки и нивните петелки беа во еден дел со него; сè тоа од чисто ковано злато.

²³А од чисто злато му направи и седум светилки, штипки и пепелници.

²⁴Светилникот и целиот негов прибор ги направи од еден талант чисто злато.

²⁵Кадилниот жртвеник го направи од багремово дрво, долг еден лакот, широк лакот - четвртест - а висок два лакта. Неговите рожиња беа во еден дел со него.

²⁶Ги опкова со чисто злато одозгора, страните наоколу и неговите рожиња. Му направи завршен венец наоколу од злато.

²⁷На него направи и две златни колца на спротивните страни, под завршниот венец, да им служат на ластегарките за рачки, кога се носи на нив.

²⁸Ги направи ластегарките од багремово дрво па ги опкова со злато.

²⁹Тогаш приготви посветено масло за помазание и за чисто мирисливо кадење, онака како што ги прави мироварецот.