Read Библија, Константинов Јов 12 Bible Online

Јов 12 - Библија, Константинов bible

Јов 12

¹Јов проговори и рече:

²„Навистина, вие сте само луѓе, мудроста ќе изумре со вас.

³Но и јас знам да мислам како и вас, во ништо не сум полош од вас: кој не знае за такви работи?

⁴Им станав потсмев на моите пријатели, зашто го повикувам Бога да ми одговори! Јас сум за потсмев: непорочниот праведник!

⁵Тој кој е близу да се клизне со нозете, е како презрен светилник во мислите на оној кој живее спокојно.

⁶Дотогаш се во мир шаторите на грабачите, предизвикувачите на Бога живеат безгрижно, зашто Бог ги снабдува со Својата рака!

⁷Но, прашај ги животните, и ќе те поучат; прашај ги небесните птици, и ќе ти објаснат.

⁸Земните гуштери ќе ти го протолкуваат тоа, рибите во морето ќе ти раскажат.

⁹Од создавањето на светот, кој од нив не знае, дека Божјата рака го создаде сè тоа.

¹⁰Во неговата рака лежи животот на секое суштество и животворниот здив на секое човечко тело.

¹¹Зар со увото ние не ја распознаваме беседата како што со јазикот го испитуваме вкусот на јадењето?

¹²Седите коси му донесуваат мудрост на човекот, а со долгиот век му доаѓа умноста.

¹³Но во Него е мудроста и силата, во Него се советот и сета разумност.

¹⁴Што ќе разурне, никој не ќе го изгради, кого ќе го затвори, никој не го ослободува.

¹⁵Ако ја задржи водата, постанува суша, ако ја пушти, целата земја ја избуричкува.

¹⁶Зашто во Него се силата и сета мудрост, Негови се измамениот и измамникот.

¹⁷Тој ги лишува советниците од разум, умните судии ги прави глупави.

¹⁸Тој го распашува појасот на царевите и со јаже им го врзува бедрото.

¹⁹Тој ги тера првенците боси и ги симнува од власт силниците.

²⁰Тој го одзема зборот од устата на зборливите и од старците вистинското расудување.

²¹Тој излева презир врз првенците и ги распашува бедрата на јунаците.

²²Тој ги открива темнините на длабочините и смртната сенка ја изведува на светлина.

²³Тој го издига народот, па го уништува, го умножува, а потоа го искоренува.

²⁴Тој ги залудува владетелите на народите, па лутаат по непроодни пустини

²⁵и пипаат во темнина без светлина, залетнувајќи како пијаници.”