Read Библија, Константинов Јов 20 Bible Online

Јов 20 - Библија, Константинов bible

Јов 20

¹Тогаш Софар Нааматецот проговори и рече:

²„Мислите ме тераат да ти одговорам, и затоа во мене врие тоа возбудување,

³додека ги слушам укорите што ме срамат, но мојот дух на разумот веќе ќе најде умен одговор.

⁴Зар тебе не ти е познато од старо време, од кога е поставен човекот на земјата,

⁵дека е кратковремена радоста на нечесниот, дека среќата на безбожникот поминува како миг?

⁶Макар со растот да порасте и до небото, а неговата глава да допре до облаците,

⁷тој исчезнува засекогаш како призрак. Кои го видоа велат: „Каде е сега тој?”

⁸Тој се расплинува како сон без трага, исчезнува како ноќен привид.

⁹Ниедно око нема веќе да го гледа, ниту неговото место ќе го види.

¹⁰Бедните ќе ги гонат неговите деца: со своите раце ќе си го вратат имотот.

¹¹Неговите коски беа бујни со младост, ете, тие лежат во правот.

¹²Злото и беше слатко на неговата уста, па го криеше под својот јазик;

¹³се насладуваше внимавајќи да не го голтне, и го задржуваше под своето непце.

¹⁴Но таа храна му гние во утробата, змиски отров станува во цревата.

¹⁵Проголтаното богатство треба да го изблува. Бог ќе го истера од неговата утроба.

¹⁶Цицаше отров од змиска глава: сега умира од јазикот на отровницата.

¹⁷Тој веќе нема да гледа потоци со масло, ниту ќе види како мед и млеко течат по реката.

¹⁸Ќе ја врати печалбата, без да вкуси од неа, нема да ужива во плодот на трговијата.

¹⁹Зашто сиромаштијата ја тапчеше и ја угнетуваше, одземаше куќи што не ги изградил,

²⁰зашто немаше крај на неговото лакомство, неговите богатства нема да го избават.

²¹Зашто неговата ненаситност не поштедуваше ништо, ни неговата среќа не ќе трае долго.

²²Среде изобилството ќе се најде во тешка состојба, бедата ќе се нафрли врз него со сета сила.

²³И додека го полни со храна својот желудник, Бог ќе ја пушти на него јароста на Својот гнев, ќе истури дожд врз него додека сè уште јаде.

²⁴Ако и му избега на железното оружје, бронзен лак ќе го прониже со стрела.

²⁵Ќе ја извлечеше стрелата, но таа му ги проби плеќите, а блескавиот врв стрчи од неговата жолчка, каде и да тргне, го дебнат трепети,

²⁶Сите темнини го чекаат молкум него. Го уништува оган, незапален од некого, и голта сè под неговиот шатор.

²⁷Ете, небото го открива неговото беззаконие и сета земја се крева против него.

²⁸Богатството на домот ќе му исчезне, ќе го расфрлат во денот на Божјиот гнев.

²⁹Бог им приготвува таква судбина на злосторниците и Тој му досудува такво наследство.”