Read Библија, Константинов Јов 24 Bible Online

Јов 24 - Библија, Константинов bible

Јов 24

¹„Зошто времињата не се скриени од Семоќниот, а верниците не ги видуваат Неговите денови?

²Безбожниците ги преместуваат меѓите, ограбуваат стадо и го пасат.

³Им го одведуваат ослето на сирачето, го земаат во залог волот на вдовицата.

⁴Ги тераат бедните од патот; се кријат бедните на земјата.

⁵Како диви ослици во пустината рано одат да заграбат плен: пустината им ги храни децата.

⁶Тие собираат во туѓа нива, го берат лозјето на опакиот.

⁷Голите немаат облека ноќе, ни покривка против студот.

⁸Тие киснат од планинските поројни дождови; без засолниште, се долепуваат до карпата.

⁹Го оттгргнуваат сиракот од градата, земаат во залог дете од бедниот.

¹⁰Одат голи, немаат облека; изгладнети, носат туѓи снопови.

¹¹Кои цедат масло меѓу ѕидовите; жедни, газат во каците.

¹²Луѓето на умирање офкаат низ градовите, и душите на ранетите викаат за помош, но Бог се оглушува на сè тоа.

¹³Има такви, кои ја мразат светлината: не ги признаваат нејзините патишта, ниту се придржуваат до нејзините патеки.

¹⁴Убиецот се крева во мракот, ги коле бедниот и сиромашниот.

¹⁵Окото на прељубникот копнее за примрак: „Никој нема да ме види,” вели тој и го прекрива своето лице со превез.

¹⁶Во темнината ги пробива куќите, оние куќи, кои ги забележал дење. Тие не сакаат да знаат за светлина.

¹⁷Зората им е како смртна сенка: штом зазори силен страв ги фаќа.

¹⁸Тој е побрз од водите, избегнувајќи го патот преку лозјата, неговите имоти се проколнати во земјата.

¹⁹Како што горештината и жегата го впиваат снегот, така и Подземјето ги проголтува грешниците.

²⁰Крилото што го роди го заборави, неговото име не се спомнува веќе; неправдата е скршена како стебло.

²¹Тој измачуваше жена неротка, не и стори добро на вдовицата.

²²Но оној што силно ги фаќа насилниците, станува, а за нив гасне сета надеж.

²³Му даде сигурност, и тој се надева; со окото ги надгледуваше неговите патеки.

²⁴Се воздигнаа за малку, а тогаш исчезнаа, се рушат и изгниваат како сите други, пресечени како главите на класовите.

²⁵Не е ли така? Кој ќе ме изобличи во лага? Кој може да ги поништи моите зборови.