Read Библија, Константинов Јов 29 Bible Online

Јов 29 - Библија, Константинов bible

Јов 29

¹Јов ја продолжи својата беседа и рече:

²„О да можам да ги проживеам минатите месеци, оние денови кога Бог бдееше над мене.

³Кога Неговиот светилник светеше над мојата глава, а Неговата светлина ме водеше низ темнината,

⁴како во годините на мојата зрелост, кога Божјата добрина беше над мојот дом.

⁵Кога Сèдржителот уште беше со мене и моите деца ме опкружуваа,

⁶кога моите нозе ги миев во млеко, а мојот камен излеваше потоци масло!

⁷Кога излегував над градската врата и ја поставував својата столица на раскрсницата,

⁸откако ќе ме видеа, младите се криеја; старците откако ќе станеа, стоеја,

⁹првенците го прекратуваа разговорот и ја ставаа раката на својата уста.

¹⁰Гласот на началниците стивнуваше сосем, јазикот им се залепуваше за непцето.

¹¹Секој што ме слушаше, ме наречуваше блажен, ме фалеше окото, што ќе ме видеше.

¹²Зашто, го избавував бедниот кога викаше и сиракот оставен без помош.

¹³Благословот на изгубените беше врз мене, јас му ја враќав веселбата на срцето на вдовицата.

¹⁴Се облекував во правдата како со облека, беспристрасноста ми беше наметка и венец.

¹⁵Бев очи на слепиот и бев нозе на хромиот.

¹⁶Татко на бедните, застапник на странците.

¹⁷Го разгледував внимателно делото на непознатиот, му ги кршев челустите на беззаконикот, го истргував пленот од неговите заби.

¹⁸Велев: „Ќе издивнам во своето гнездо, како палма, проживувајќи безбројни денови.”

¹⁹Моите корења се простираат до водата, росата почива на моите гранки.

²⁰Мојата слава ќе се подмладува секогаш, и лакот ќе се обновува во мојата рака.

²¹Слушаа желно што ќе им кажам, и молчеа за да чујат совет од мене.

²²Ништо не додаваа на моите зборови, и моите беседи капеа како дожд врз нив.

²³Тие копнееја по мене како по дожд, отвораа уста како за летен пороен дожд.

²⁴Мојата насмевка им беше охрабрување; внимаваа на ведроста на моето лице.

²⁵Јас им ги избирав патиштата, јас ги предводував како поглавар, како цар кога е среде своите чети, како оној кој ги теши јадосаните.