Read Библија, Константинов Јов 5 Bible Online

Јов 5 - Библија, Константинов bible

Јов 5

¹Ајде повикувај! Зар ќе ти одговори некој? На кој од светците мислиш да му се обрнеш сега?

²Навистина, безумниот го убива неговиот гнев, љубомората ќе го докрајчи сосем лудиот.

³Видов безумник како се вкоренува, но веднаш ја проколнував неговата куќа.

⁴Неговите синови се далеку од сигурност, незаштитени, ги тормозат во вратите.

⁵Гладните ја изедуваат нивната жетва, самиот Бог им ја одзеде од устата, а жедните лакомат за нивните имоти.

⁶Не, нечесноста не излегува сама од земјата, ниту неволјата може да никне сама од почвата,

⁷туку човекот се раѓа за страдањата, како што орловиот лет се стреми кон висината.

⁸Но јас ќе Го побарам Бога и пред Него би ја образложил мојата работа.

⁹Тој создаде силни недоловливи дела, чудеса што не можат да се избројат.

¹⁰Тој роси дожд по сето лице на земјата, и испраќа вода да ни ги натопи полињата.

¹¹За да ги издигне високо понижените, за да ги надари со среќа нажалените?

¹²Редум го руши она што итреците го смислуваат, сè што со раце спроведуваат, Тој им го изјаловува.

¹³Тој ги фаќа мудрите во нивното лукавство, намислите на сплеткарите, ги претворува во ништо.

¹⁴Среде бел ден, запаѓаат во темнина, пипаат на пладне, како среде ноќта.

¹⁵Тој го избавува бедниот од нивниот меч, го издига сиромашниот од силничките раце.

¹⁶Така му се покажува надежта на бедниот и неправдата треба да ја затвори устата.

¹⁷Да, блазе му на човекот кого Бог го изобличува, затоа не презирај го ти карањето на Сèсилниот!

¹⁸Тој ранува, но ја преврзува раната, удира, и залечува со Својата рака.

¹⁹Ќе те избави од шест неволји, ни во седмата злото нема да те допре.

²⁰Во глад, ќе те спаси од смрт, а во војна, ќе те грабне од остриот меч.

²¹Ќе го отстрани од тебе бичот на лошиот јазик, без страв ќе бидеш пред грабнувачот.

²²Ти ќе им се смееш на сушата и студот, и не ќе се плашиш од дивите ѕверови.

²³Ти ќе склучиш сојуз со камењата на нивата, дивите ѕверови ќе бидат во мир со тебе.

²⁴Ќе уживаш мир во својот шатор, кога ќе го посетиш својот дом, ќе стои негибнат.

²⁵Ќе гледаш како се множи твоето колено и како твоето потомство расте како трева.

²⁶Ти ќе легнеш во гробот кога ќе бидеш стар, како што се собира житниот сноп кога ќе дозрее.

²⁷Го набљудуваме сè ова: вистина е жива! Затоа ти послушај сè за твое добро.