Read Библија, Константинов Јов 8 Bible Online

Јов 8 - Библија, Константинов bible

Јов 8

¹Тогаш проговори Валдад од Шуах и рече:

²„Уште до кога ќе зборуваш така, до кога твојот збор ќе биде како виор?

³Па зар може Бог да ја гази правината, може ли Сèсилниот да ја изопачи правдата?

⁴Ако твоите деца Му згрешија, затоа ги предаде на нивните беззаконија.

⁵Но ако го побараш Бога искрено и замолиш ти милост од Сèдржителот;

⁶ако бидеш чист и непорочен, отсега Тој секогаш ќе бдее над тебе и ќе ја обнови куќата на праведникот.

⁷Ќе биде мала твојата мината среќа, во однос на идната што ќе те чека.

⁸Но прашај ги само поранешните поколенија, внимавај на мудроста на нивните татковци.

⁹Ние сме од вчера и не знаеме ништо, нашите земни денови се како сенки.

¹⁰Тие ќе те поучат и ќе ти речат, од своето срце ќе извлечат беседи:

¹¹Зар ќе никне рогозата вон мочуриштето? Зар ќе порасте трската без вода?

¹²Сета се зелени, но и некосена се исушува пред секоја друга трева.

¹³Такви се патиштата на секој што го заборава Бога; така пропаѓа надежта на безбожниците;

¹⁴тенка е нишката на неговото надевање, а неговата надеж е пајакова куќа.

¹⁵Ако се потпре, таа му се ниша, ако се фати за неа, таа му се разурнува.

¹⁶Се зеленее тој и целиот расте бујно на сонцето, млади гранчиња му ја покрија целата градина.

¹⁷Со своите корења ги испреплетка карпите, и црпи живот од жив камен.

¹⁸Но ако некој го откорне од местото, тогаш тоа ќе се одрече од него кажувајќи: никогаш не сум те видел.

¹⁹И еве сега како гине на патот, додека друго билје веќе никнува од земјата.

²⁰Не, Бог не ќе ги отфрли непорочните, ниту ќе ги потпре рацете на злосторниците.

²¹Смевот пак ќе ти ја наполни устата, а од усните ќе одекне воскликнување.

²²Срамот ќе ги облече твоите непријатели и шаторот на злочинците ќе исчезне.”