Read Библија, Константинов Псалми 10 Bible Online

Псалми 10 - Библија, Константинов bible

Псалми 10

¹Зошто, Господи, стоиш далеку, зошто се криеш во време на неволја?

²Од гордоста на нечесните се измачуваат бедните; нека се фатат во сплетките што ги замислија.

³Безбожникот се фали со желбите на својата душа; среброљубецот се одречува од Господа и Го презира.

⁴Безбожникот вели во својата гордост: не, нема истраги! Па нема ни Бог! Такво е неговото мислење.

⁵Неговите патишта секогаш се опаки; на Твоите судови тој и не мисли; ги презира сите свои противници.

⁶Во своето срце вели: „Нема да се расколебам! Нема да бидам несреќен - од род во род.”

⁷Устата му е полна со клетви, итрини и измами, под неговиот јазик има злоба и гибел.

⁸Седи во заседа, покрај оградите во селата, потајно го убива невиниот, со очите го демне бедниот.

⁹Седи во засолниште, како лав во пештера, демне да го ограби сиромашниот и да го вовлече во својата мрежа.

¹⁰Се притајува, прилегнува, и беспомошните паѓаат под неговата сила.

¹¹Во своето срце вели: „Бог заборави, го крие Своето лице и нема да види никого.”

¹²Стани, Господи Боже, крени ја Својата рака! Не заборавај ги бедните!

¹³Зошто безбожникот Го презира Бога? Тој вели во своето срце: „Нема да води истрага.”

¹⁴Ти виде, зашто ги гледаш неправдите и маките, и ги мериш во раката. Бедниот Ти се доверува Тебе, Ти си му помошник на сирачето.

¹⁵Сотри му ја мишката на нечестивиот, и на злотворот, казни му го лукавството, за да не биде повеќе.

¹⁶Господ е Цар, секогаш, низ вековите, ќе ги снема народите од Неговата земја.

¹⁷Господи, Ти ги слушаш желбите на кротките; зајакни им ги срцата; отвори го Своето уво:

¹⁸да го заштитиш правото на сирачето и угнетуваниот, така што човекот, кој е од земја, да не застрашува веќе.