Read Библија, Константинов Псалми 102 Bible Online

Псалми 102 - Библија, Константинов bible

Псалми 102

¹Молитва на страдалник, кога тој тажи и ја излива својата тага пред Господа. Господи, послушај ја мојата молитва, и мојот повик нека стигне до Тебе!

²Не го криј Твоето лице од мене, во денот на мојата неволја! Наведни го Твоето уво кон мене: во денот кога ќе Те повикам, послушај ме бргу!

³Зашто моите денови исчезнуваат како дим, а моите коски горат како оган.

⁴Моето срце се суши како косена трева и заборавам да го јадам мојот леб.

⁵Од моите силни офкања, моите коски се долепија до мојата кожа.

⁶Сличен сум на несит во пустина, станав како буф во пуста урнатина.

⁷Лишен сум од сон, како осамено врапче на покривот.

⁸Секојдневно ме укоруваат моите непријатели, тие што беснеат на мене, проколнуваат со моето име.

⁹Јадам пепел како леб, а својот пијалак го мешам со солзи,

¹⁰заради Твојата лутина и гневот, зашто ме воздигна и ме фрли.

¹¹Моите денови се како издолжена сенка, а јас, ете, се сушам како трева.

¹²А Ти, о Господи, остануваш довека, и Твоето име низ сите родови.

¹³Стани, смилувај му се на Сион: Време е да му се смилуваш, сега е часот!

¹⁴Зашто мили им се неговите камења на твоите слуги, ги жалат неговите урнатини.

¹⁵Тогаш, Господи, многубошците ќе се бојат од Твоето име, и сите цареви на земјата од Твојата слава.

¹⁶Кога Господ пак ќе го изгради Сион, кога ќе се покаже во Својата слава,

¹⁷кога ќе погледне кон молитвите на лишените, и не ја презре нивната молитва.

¹⁸Нека се запише ова за идното поколение, и луѓето што ќе бидат создадени, ќе Го фалат Господа.

¹⁹Зашто Бог гледа од Своето возвишено светилиште, гледа од небесата кон земјата,

²⁰за да ги чуе воздишките на затворените, за да ги ослободи осудените на смрт,

²¹за да се навести Господовото име на Сион, и Неговата фала во Ерусалим,

²²кога ќе се соберат народите и царствата, за да Му служат на Господа.

²³Патем ги истроши моите сили, ми ги скрати деновите.

²⁴Реков: „Мој Боже, не ме земај во средина на моите дни! Твоите години остануваат низ сите поколенија.

²⁵Во почетокот ја основа земјата и небото е дело на Твоите раце.

²⁶Тие ќе исчезнат, а Ти ќе останеш, сè ќе остарее како облеката. Ги менуваш како облеките, и ги снемува.

²⁷Ти си секогаш ист - нема крај на Твоите години.

²⁸Децата на Твоите слуги ќе живеат во мир, и нивното потомство ќе трае пред Тебе.”