Read Библија, Константинов Псалми 103 Bible Online

Псалми 103 - Библија, Константинов bible

Псалми 103

¹Давидов псалм. Благословувај Го Господа, душо моја, и сè што е во Мене: Неговото свето име!

²Благословувај Го Господа, душо моја, и не заборави ги Неговите добротворства:

³Тој ги проштава сите твои гревови, Тој ги исцелува сите твои болести;

⁴Тој ти го спасува животот од распадливост, те овенчува со добрина и љубов;

⁵Ти го исполнува животот со добрини, твојата младост се обновува како на орелот.

⁶Господ прави праведни дела, и на угнетуваните им ја враќа правдата,

⁷на Мојсеј му ги објави Своите патишта, на Израелевите синови Своите дела.

⁸Жалостив и милостив е Господ, долготрпелив и многу милостив.

⁹Не е јаросен за вечни времиња, ниту Неговиот гнев пламнува довека.

¹⁰Не постапува со нас според нашите гревови, ниту ни плаќа според нашите беззаконија.

¹¹Зашто колку е небото високо над земјата, толку е голема Неговата милост кон оние што се бојат од Него.

¹²Колку е исток далеку од запад, толку ги оддалечува од нас нашите беззаконија.

¹³Како што таткото ги милува синовите, така Господ ги милува оние, кои се бојат од Него.

¹⁴Зашто знае добро како сме создадени, си спомнува дека сме прав.

¹⁵Човековите денови се како трева, цветаат како полски цвет;

¹⁶штом ветерот ќе го допре, и веќе го нема, ни неговото место не го помни.

¹⁷Но Господовата љубов е вечна над оние кои се бојат од Него, и Неговата правда над синовите на синовите,

¹⁸над оние што го чуваат Неговиот завет, и ги помнат Неговите заповеди, за да ги исполнат.

¹⁹Господ го постави Својот престол на небо, и Неговото Царство владее над сè.

²⁰Благословувајте Го Господа, сите Негови ангели, вие моќни во силата, кои го исполнувате Неговиот збор, послушни на гласот од Неговото слово!

²¹Благословувајте Го Господа, сите Негови воинства, Негови слуги, што ја исполнувате Неговата волја!

²²Благословувајте Го Господа, сите Негови дела, во секое место на Неговото владеење! Благословувај Го Господа, душо моја!