Read Библија, Константинов Псалми 105 Bible Online

Псалми 105 - Библија, Константинов bible

Псалми 105

¹Славете Го Господа, повикувајте Го Неговото име, навестувајте ги Неговите дела меѓу народите!

²Пејте Му, свирете Му, раскажувајте ги сите Негови чудеса!

³Фалете се со Неговото свето име, нека се радува срцето на оние, кои Го бараат Господа!

⁴Барајте Го Господа и Неговата сила, барајте Го секогаш Неговото лице!

⁵Спомнете си за чудесата што ги направи, за чудата и за судовите на Неговата уста!

⁶Авраамовиот род е Негов слуга, Јакововите синови Негови избраници!

⁷Тој е Господ, Бог наш; Неговите судови се по целата земја!

⁸Тој си спомнува секогаш за Својот Завет, за словото што им го кажа на илјади поколенија:

⁹за Заветот што го склучи со Авраам, и за Својата заклетва на Исак.

¹⁰Го воспостави како закон за Јакова, вечен Завет за Израел,

¹¹зборувајќи: „Тебе ќе ти ја дадам Ханаанската Земја, како дел во вашето наследство.”

¹²Кога уште беа малку на број, многу малку, и кога беа придојденици во неа,

¹³одеа од народ до народ, од едно царство кон друг народ.

¹⁴Но не остави никого да ги угнетува, ги казнуваше царевите заради нив:

¹⁵„Не гибајте ги Моите помазаници, не нанесувајте им зло на Моите пророци!”

¹⁶И Тој го повика гладот на земјата, ги уништи сите житници за леб.

¹⁷Испрати човек пред нив: Јосиф беше продаден во ропство.

¹⁸Ги врзаа со окови неговите нозе, вратот му го ставија во железо.

¹⁹Додека не се исполни неговото пророштво, за да се потврди Господовото слово.

²⁰Царот нареди да го одврзат, управителот на народите го ослободи.

²¹Го постави за домаќин на својот дом, за управител на сиот свој имот.

²²Да ги врзува кнезовите по своја волја, и да ги учи неговите старци на мудрост.

²³Тогаш Израел влезе во Египет, Јаков се пресели во Хамовата Земја.

²⁴Го умножи многу Својот народ, го направи посилен од непријателите.

²⁵Им го сврти срцето за да го замразат Неговиот народ, за да бидат лукави кон Неговите слуги.

²⁶Го испрати Мојсеја, Својот слуга, Арона, кого го одбра.

²⁷Ги правеа Неговите знаци меѓу нив и чудеса во Хамовата Земја.

²⁸Испрати темнина, и се смрачи, но тие не се противеа на Неговите зборови.

²⁹Им ги претвори водите во крв и ги помори нивните риби.

³⁰Заврвеа жаби низ нивната земја, проникнаа и во царските соби.

³¹Рече: и рој муви долета, и комарци во сите нивни краишта.

³²Место дожд им даде град, огнени секавици во нивната земја.

³³Ги удри нивните лозја и смокви, ги искрши дрвата во нивните предели.

³⁴Рече: и скакулци дојдоа и безбројни гасеници со нив.

³⁵Ги изедоа сите растенија во нивната земја, го изедоа плодот на нивните ниви.

³⁶Ги порази сите првороденци во нивната земја, сите прваци на нивната сила.

³⁷Ги изведе со сребро и злато; во нивните племиња немаше болни.

³⁸Египет се зарадува на нивното заминување, зашто го опфати страв од нив.

³⁹Го распростре облакот како покрив, и оган да свети во ноќта.

⁴⁰Замолија, и доведе препелици, со небески леб ги нахрани тогаш.

⁴¹Ја расцепи карпата, и вода извираше, потече како река низ пустината.

⁴²Тогаш се сети за Своето ветување, што му го даде на Својот слуга Авраам.

⁴³Го изведе Својот народ со воскликнување и со веселба Своите избрани.

⁴⁴И им ја даде многубожечката земја, го наследија трудот на народите,

⁴⁵за да ги чуваат Неговите повелби и да ги пазат Неговите закони. Алилуја!