Read Библија, Константинов Псалми 106 Bible Online

Псалми 106 - Библија, Константинов bible

Псалми 106

¹Алилуја! Фалете Го Господа, зашто е благ! Зашто е вечна Неговата милост!

²Кој може да ги искаже Господовите моќни дела? Кој ли ќе Му ги разгласи сите Негови пофалби?

³Блажени се оние, кои ги држат Неговите наредби и кои прават правда во секое време!

⁴Спомни си за мене, Господи, според добрината кон Својот народ, посети ме со Своето спасение,

⁵за да ја уживам среќата на Твоите избраници, за да се радувам со радоста на Твојот народ, за да се фалам со Твоето наследство.

⁶Згрешивме како нашите татковци, правевме беззаконија, работевме безбожно.

⁷Нашите татковци во Египет, незагрижени за Твоите чудеса, не си спомнуваа за Твојата голема милост, туку се побунија крај морето, крај Црвеното Море.

⁸Но Тој ги избави заради Своето Име, за да ја покажеш Својата сила.

⁹Му заповеда на Црвеното Море и тоа пресуши, ги преведе меѓу брановите како низ пустина.

¹⁰Ги избави од рацете на нивните мразители, ги ослободи од рацете на душманите.

¹¹И водите ги покрија нивните непријатели, не остана ниеден од нив.

¹²Тогаш поверуваа на Неговите зборови и Му пееја пофалби.

¹³Но речиси ги заборавија Неговите дела, не се надеваа на Неговата волја.

¹⁴Се полакомија многу во пустината, Го искушуваа Бога во осаменост.

¹⁵И им даде што бараа, но им испрати треска во нивните души.

¹⁶Му завидеа тогаш на Мојсеја, во логорот, на Арона, Господовиот светија.

¹⁷Земјата се отвори и го голтна Датана, и ја покри Авироновата дружина.

¹⁸Оган падна врз сета негова дружба и пламенот ги изгоре злотворите.

¹⁹Направија теле во Хорив, му се поклонуваа на лик излеан од злато.

²⁰Ја заменија својата Слава со лик на бик, што јаде трева.

²¹Го заборавија Бога, Спасителот свој; во Египет, правејќи знаци

²²и чудеса во Хамовата Земја, и стравотии при Црвеното Море.

²³Веќе намисли да ги сотре, но Мојсеј, Неговиот избраник, се зазеде за нив, за да Му го одврати гневот и да не ги уништи.

²⁴Ја презреа тие пожелуваната земја, не верувајќи Му на Неговото слово.

²⁵Роптаа под своите шатори, не го послушаа Господовиот глас.

²⁶Се заколна тогаш со крената рака: ќе ги покоси сите во пустината,

²⁷ќе го распрсне нивното поколение меѓу народите, ќе ги растури нив по земјата.

²⁸Му се посветија на Валфегора и јадоа жртви за мртвите.

²⁹Го предизвикаа со своите зли дела, и Тој фрли на нив помор.

³⁰Но стана Финес, и Го умилостиви, и поморот го снема тогаш.

³¹Тоа му се засмета за заслуга, во сите поколенија довека.

³²Го разгневија пак кај Меривските Води, и зло го погоди Мојсеја заради нив,

³³зашто му го огорчија духот, изусти невнимателен збор.

³⁴И не ги истребија народите, за кои Господ им беше наредил.

³⁵Се измешаа со многубошците, ги научија нивните дела;

³⁶ги почитуваа нивните ликови, што им станаа стапица.

³⁷Им ги жртвуваа своите синови и своите ќерки на демоните.

³⁸Пролеваа невина крв, крвта на своите синови и ќерки, што ги жртвуваа на ханаанските ликови. Земјата беше онечистена од крв,

³⁹се извалкаа со своите дела, направија прељуба со своите зли дела.

⁴⁰Господ пламна со гнев на Неговиот народ, Му се згнаси Неговото наследство.

⁴¹Ги предаде во рацете на многубошците, и нивните мразители управуваа над нив.

⁴²Непријателите ги измачуваа и ги угнетуваа со својата рака.

⁴³Ги избавуваше пречесто, ама Го разјарија со своите совети: беа покосени заради своите беззаконија.

⁴⁴Тој погледна пак на нивната неволја, кога ги чу нивните молитви

⁴⁵и се сети за Својот Завет со нив, се сожали на нив во Својата голема милост.

⁴⁶Направи да најдат милост кај оние, што ги пленија.

⁴⁷Спаси нè, Господи, наш Боже, и собери нè од безбожните народи, за да Го славиме Твоето свето Име, за да се фалиме со Твојата Слава.

⁴⁸Благословен да е Господ, Израелевиот Бог, одвека довека! И сиот народ нека рече: „Амин! Алилуја!”