Read Библија, Константинов Псалми 107 Bible Online

Псалми 107 - Библија, Константинов bible

Псалми 107

¹Славете Го Господа, зашто е благ, зашто Неговата милост е вечна!

²Така нека речат сите избавеници, кои Господ ги избави од непријателските раце,

³и кои ги собра од сите земји: од исток и запад, од север и југ.

⁴Скитаа низ пустината, во пуста осаменост, не наоѓајќи пат до населен град.

⁵Беа гладни, изморени од жед, душата истоштена во нив.

⁶Тогаш извикаа на Господа во својата тешкотија, и Тој ги избави од сите неволји.

⁷Ги поведе по правиот пат, за да стигнат до населен град.

⁸Нека Го слават Господа за Неговата милост, за Неговите чудеса кон човечките синови,

⁹зашто Тој ја насити гладната душа, Тој ја наполни со добрина изгладнетата душа.

¹⁰Седеа во мрак и во темнина, оковани со беда и со железо,

¹¹зашто и се противеа на Божјата беседа и го презреа наумот на Сèвишниот.

¹²Заради тоа им го скрши срцето со страдања, се слизнуваа, а немаше никој да им помогне.

¹³Тогаш извикаа кон Господа во својата тешкотија, и Тој ги спаси од сите неволји.

¹⁴Ги изведе од мрак и од темнина, ги скина нивните окови.

¹⁵Нека Го фалат Господа за Неговата добрина, за Неговите чудеса кон човечките синови!

¹⁶Зашто ја разби бронзената врата и ги скрши железните лостови.

¹⁷Неразумните се мачеа заради своите бунтовни патишта, поради своите безумности, се мачеа.

¹⁸Секое јадење и се гадеше на нивната душа, дојдоа до вратата на смртта.

¹⁹Тогаш извикаа кон Господа, во својата беда, и Тој ги спаси од сите неволји.

²⁰Го испрати Своето слово, за да ги оздрави, и за да им го спаси животот од гробната јама.

²¹Нека Го фалат Господа за Неговата добрина, за Неговите чудеса кон човечките синови!

²²Нека принесуваат благодарни жртви, и воскликнувајќи нека ги раскажуваат Неговите дела.

²³Тие кои забродија со бродови по морето, да тргуваат по силните води:

²⁴тие ги видоа Господовите дела, Неговите чудеса во длабочните.

²⁵Тој рече и буроносниот ветер се завиори, што ги крева морските бранови во височина.

²⁶Се креваа до небо, се спуштаа во бездна. Душата им гинеше во неволја.

²⁷Се лулаа и се слизнуваа како пијани, сета мудрост ги изневери.

²⁸Тогаш извикаа кон Господа во својата тешкотија и Тој ги истрга од сите неволји.

²⁹Ја смири бурата со тивко ветерче, морските бранови молкнаа.

³⁰Се израдуваа на тишината, Тој ги поведе во желно пристаниште.

³¹Нека Го фалат Господа за Неговата добрина, за Неговите чудеса кон човечките синови!

³²Нека Го возвишуваат во народното собрание, Нека Го фалат во советот на старците!

³³Тој ги претвори: реките во пустина, а водните извори во жедна земја;

³⁴плодоносната земја во солена пустина, заради лошотијата на нејзините жители.

³⁵Тој ја претвори пустината во езеро, а сувата земја во водени извори.

³⁶И ги насели таму изгладнетите, па изградија град каде ќе живеат.

³⁷Ги засеаја нивите, ги засадија лозјата, што им донесоа изобилни плодови.

³⁸И Тој ги благослови, па се намножија многу, и стадата не им се намалија.

³⁹Беа проредени и презрени, под товарот на страдањата и неволјите.

⁴⁰Оној Кој излива презрение кон кнезовите, ги пушти да скитаат по пусти патишта.

⁴¹Го издига бедниот од неволја и ги умножи семејствата како стадо.

⁴²Гледајќи го тоа, нека се радуваат чесните, а беззаконикот нека си ја затвори устата!

⁴³Кој е мудар, нека размисли за сè тоа и нека ја согледа Господовата милост.